Mabuhay ka, Islay Erika Bomogao!

MABUHAY KA, ISLAY ERIKA BOMOGAO!

tinalo mo ang Thai sa isports na Muay Thai

iba ka talaga pagkat napakahusay

mabuhay ka sa iyong nakamit na gintô

na sa batà mong edad ay di ka nabigô

kababayan mo si misis na Igorota

bagamat walâ na siya'y naaalala

pag may taga-Cordillera na nagwawagi

sa anumang larangan, di basta nagapi

mula ka sa lahi ng mga mandirigmâ

di kayo nasakop ng buhong na Kastilà

mula sa lahing matatapang, magigiting

sa martial arts, ipinakita mo ang galing

isang puntos lang ang lamang mo sa kalaban

sa larang na bansâ nila ang pinagmulan

mabuhay ka, O, Islay Erika Bomogao!

talà kang sadyang sa daigdig ay lumitaw!

- gregoriovbituinjr.

12.18.2025

* mula sa pahayagang Abante Tonite, Disyembre 18, 2025, p.8

Bienvenue, Chez Nous

BIENVENUE, CHEZ NOUS

sa sahig ng nasakyang traysikel

nakasulat: Bienvenue, Chez Nous

Home Sweet Home, habang ako'y pauwi

na para bang ang sasalubong ay

magandang bahay, magandang buhay

kahulugan nito'y sinaliksik

Bienvenue ay Welcome sa Paris

habang Chez Nous naman ay Our Home

kaygandang bati nang pag-uwi'y may

magandang bahay, maalwang buhay

salamat sa sinakyang traysikel

sa nabasa kahit ako'y pagod

sa maghapong paglakò ng aklat

ay may uuwian pa rin akong

bahay na ang loob ko'y palagay

- gregoriovbituinjr.

12.17.2025

* mapapanood ang bidyo sa kawing na: https://web.facebook.com/share/r/16sRK71DTp/ 

Konsehal, kinasuhan ng kapwa konsehal

KONSEHAL, KINASUHAN NG KAPWA KONSEHAL

(Tulâ batay sa balità sa pahayagang Bulgar, isyu ng DIsyembre 17, 2025, tampok na balita, at ulat sa pahina 2)

kapwa ko pa taga-Sampaloc, Maynilà ang sangkot

sa headline ng pahayagang Bulgar ang ibinulgar

konsehala, kinasuhan ang konsehal na buktot

kung mag-isip at sa kabastuhan nitong inasal

ibinulgar sa privilege speech ng konsehala

pati ang 'yoni message' na kahuluga'y kaytindi

paghipo sa kanyang kamay ng tinawag na Kuya

na pawang kabastusan ang ipinamamarali

di iyon paglalambing kundi sa puri'y pagyurak

mabuti't ang konsehala'y matatag at palaban

kinasuhan na ng paglabag sa Safe Spaces Act

ang konsehal na umano'y sagad sa kabastuhan

marami nang mga kurakot, marami pang bastos

kailan lingkod bayan ay magiging makatao?

kayraming trapong sa buwis ng bayan ay nabusog

kailan pa titinó ang mga nabotong trapo?

kayâ tamà lang baligtarin natin ang tatsulok!

sa konsehala ng Distrito Kwatro, pagpupugay!

saludo sa tapang mong labanan ang mga bugok

nawa hustisya'y kamtin mo, mabuhay ka! Mabuhay!

- gregoriovbituinjr

12.17.2025

Sa 3 bayaning nagdiwang ng ika-150 kaarawan ngayong 2025

SA 3 BAYANING NAGDIWANG NG IKA-150 KAARAWAN NGAYONG 2025

pagpupugay po kina Oriang, Goyò, at Pingkian

sa kanilang pangsandaan, limampung kaarawan

ngayong taon, kabayanihan nila'y kinilala

na noong panahon ng mananakop nakibaka

si Oriang na asawa ng Supremo Bonifacio

Lakambini ng Katipunan, rebolusyonaryo

si Heneral Goyò ay napatay ng mga Kanô

sa Pasong Tirad, na inalay ang sariling dugô

si Gat Emilio Jacinto, Utak ng Katipunan

kasangga't kaibigan ng Supremo sa kilusan

sa Kartilya ng Katipunan ay siyang may-akda

ang Liwanag at Dilim niya'y pamana ngang sadyâ

taaskamaong pagpupugay sa tatlong bayani

ang halimbawa nila'y inspirasyon sa marami

sa bayan sila'y nagsilbi at nakibakang tunay

nang tayo'y lumayà sa pangil ng mga halimaw

- gregoriovbituinjr.

12.17.2025

* mga litrato mula sa google

Ang tungkulin bilang makatâ ng bayan

ANG TUNGKULIN BILANG MAKATÂ NG BAYAN

minsang tinuring na / makatâ ng bayan

nang tula'y binigkas / sa isang pagkilos

karangalang pag may / rali sa lansangan

patutulain ka't / dapat handang lubos

may ilang tungkuling / isinasabuhay

lalo't tinuring kang / makatâ ng bayan

pinahalagahan / kayâ nagsisikhay

nang tungkuling ito'y / sadyang magampanan

alamin ang datos / at isyu ng madlâ

sapagkat lalamnin / ng tulang gagawin

tutulâ sa rali / ng obrero't dukhâ

nang kanilang diwa't / puso'y pag-alabin

tulang karaniwang / may tugmâ at sukat

pinagbuti bawat / taludtod at saknong

madaling araw pa'y / mumulat, susulat

sa isyu ng masa / laging nakatuntong

kung may kathang tulâ / ang mga kasama

hihingi ng kopya / nang aking matipon

upang balang araw / ay maisasama

sa maraming akda't / isaaklat iyon

matinding tungkulin / subalit marangal

gagawin ng husay / ang bawat gampanin

kakathâ akong may / buong pagmamahal

na para sa bayan, / tula'y bibigkasin

- gregoriovbituinjr.

12.16.2025

* salamat sa kasamang kumuha ng litrato

Pagpupugay at pasasalamat, CHR!

PAGPUPUGAY AT PASASALAMAT, CHR!

natanggap ko ang backback ng Biyernes

sa isang forum para sa C.S.O.

may sertipiko pa't payong ng Martes

sabay ng araw ng Lunsad-Aklat ko

may tatak na C.H.R. at islogan

ang backpack at payong na ibinigay

na "Naglilingkod Maging Sino Ka Man"

nag-isip niyon ay napakahusay

kaylalim ng tungkuling ipagtanggol

natin bawat karapatang pantao

sa anumang paglabag tayo'y tutol

pagkat karapatan nati'y sagrado

sa C.H.R., maraming salamat po!

pagpupugay itong mula sa puso!

- gregoriovbituinjr.

12.16.2025

Taospusong pasasalamat sa tshirt

TAOSPUSONG PASASALAMAT SA TSHIRT

tinanong muna ako ng isang kasama

kung anong size ng tshirt ko, medium, sagot ko

sunod na tanong niya, ako ba'y lalahok

sa rali o pagkilos patungong Mendiola

sabi ko'y oo, di ako pwedeng mag-absent

lalo't sa Araw ng Karapatang Pantao

doon ay nagkita kami't kanyang binigay

ang tshirt hinggil sa karapatang pantao

lubos at taospusong nagpapasalamat

ang abang makata sa tshirt na natanggap

tshirt man iyon ngunit nakapagmumulat

ako'y binigyang halaga't di nalimutan

sa iyo, kasama, salamat, pagpupugay

nawa ang katulad mo'y dumami pang tunay

- gregoriovbituinjr.

12.15.2025

Hinggil sa Lunsad-Aklat ng Disyembre 9

HINGGIL SA LUNSAD-AKLAT NG DISYEMBRE 9

akala ko'y lalangawin ang Lunsad-Aklat

mabuti na lamang, may dumating na tatlo

sila'y pawang sa isyu ng bayan ay mulat

kaya kagalakan ay ramdam kong totoo

sapat iyon upang mabuhayan ng loob

at magsikap pa ring magsulat at kumathâ

kahit sa trabaho'y talagang nakasubsob

tumaas ang aking moral bilang makatâ

marami ring nagsabing di makararating

sa kanila'y pagpupugay at pasalamat

iyon ay respeto na ngang maituturing

sa kanila'y naglaan na ako ng aklat

magpatuloy lang bilang makatâ ng bayan

pati sa pagsusulat ng isyu ng masa

iyan ang ipinayo sa akin ng ilan

kaya ako'y sadyang saludo sa kanila

- gregoriovbituinjr.

12.15.2025

* nailunsad ang "Tula't Tuligsa Laban sa Korapsyon" sa CHR noong Disyembre 9 - International Anti-Corruption Day

* ngayong Disyembre 15 ang ika-150 kaarawan ng dakilang bayaning si Gat Emilio Jacinto, aka Pingkian

Ayuda ay kendi lang sa mga trapo

AYUDA AY KENDI LANG SA MGA TRAPO

heto muli tayo, malapit na ang Pasko

may ayuda muli galing sa pulitiko

regalong kendi't pera'y anong pinagmulan?

sa sariling bulsa o sa kaban ng bayan?

regalong ang ngalan ng trapo'y nakatatak

upang sa balota ba'y matandaang tiyak?

may ayuda muling ibibigay sa tao

gayong ayuda'y kendi lang sa mga trapo

pinauso nila ang kulturang ayuda

imbes na magbigay ng trabaho sa masa

imbes living wage ay ibigay sa obrero

pinaasa na lang sa ayuda ang tao

silang mga trapo'y hubaran ng maskara

baka mapansing galing silang dinastiya

iisang apelyido, mula isang angkan

namamana rin ba kung kurakot ang yaman?

matuto na tayo sa isyu ng flood control

matuto na rin tayong sa trapo'y tumutol

tanggapin ang ayudang mula buwis natin

huwag nang hayaang trapo tayo't lokohin

- gregoriovbituinjr.

12.15.2025

Ang pinakamataas na uri ng pagmamahal

ANG PINAKAMATAAS NA URI NG PAGMAMAHAL

marami ang nagsasabing ang pinakamataas

na uri ng pagmamahal ay yaong paglilingkod

sa kapwà, kayâ kumikilos ako't nangangarap

ng lipunang patas, walang dukhang naninikluhod

upang karapatang pantao nila'y irespeto

kinikilala ang dignidad kahit sila'y dukhâ

lipunang nawa'y makamit - lipunang makatao

naglilingkod sa ating kapwà, dukha't manggagawà

walang dinastiya, oligarkiya, hari, pari

walang magsasamantala't mang-aapi sa bayan

binaligtad ang tatsulok, wala nang mga uri

walang pribadong pag-aari, wala nang gahaman

nakikipagkapwa't nagpapakatao ang lahat

ang pinakamataas na uri ng pagmamahal

sa prinsipyong ito'y wala akong maisusumbat

humayo tayo't sa kapwa'y magsilbi ng may dangal

- gregoriovbituinjr.

12.15.2025

Tatlo sanang lunsad-aklat ko ngayong taon

TATLO SANANG LUNSAD-AKLAT KO NGAYONG TAON

tatlo sanang Lunsad-Aklat ko ngayong taon

naglunsad tig-isa ng Nobyembre't DIsyembre

una'y "Salin ng Tula ng mga Makatang

Palestino", ikalawa'y "Tula't Tuligsâ

Laban sa Korapsyon", ikatlo sana'y itong

muling lunsad ng akdang "Liwanag at Dilim"

ni Emilio Jacinto, na pinagdiriwang

ngayon ang kanyang ikasandaan-limampung

kaarawan, librong dati nang nalathala

subalit bagong edisyon, may mga dagdag

na bagong saliksik, ngunit di malathala

kinapos sa suporta, salapi't panahon

ang abang makatang sa pagkilos ay pultaym

"Liwanag at Dilim" sana'y muling malunsad

gayunman, Happy One-Hundred-Fiftieth Birthday

sa ating bayaning Gat Emilio Jacinto!

- gregoriovbituinjr.

12.15.2025

Tának

TÁNAK

kaysarap gamitin / ng lumang Tagalog

lalo na't patungkol / sa pagsinta't irog

sa mapulang rosas, / may mga bubuyog

na lilipad-lipad, / rosas ay kinuyog

bago sa pandinig / ang salitang "tának"

batid ko'y katugmâ / nitong isdang "banak"

ang lumang salitâ / ay ikinagalak

niring aking pusong / dama'y pagkaantak

tának: kahuluga'y / napakadalisay

purong-puro, tunay, / kaysarap manilay

wagas na pagsinta / ang iniaalay

pinakamamahal, / pag-ibig na tunay

buti't ang makata'y / nakapagsaliksik

ng salitang luma't / bago lang sa isip

na sa kakathai'y / nais na isiksik

pagkat matulaing / kaysarap malirip

- gregoriovbituinjr.

12.14.2025

* tanak - mula sa Diksiyonaryong Adarna, p.902

Kaypanglaw ng gubat sa lungsod

KAYPANGLAW NG GUBAT SA LUNGSOD

anong panglaw nitong gubat sa kalunsuran

araw-araw na lang iyan ang magigisnan

dahil ba kayraming kurakot sa lipunan?

dahil laksa ang buktot sa pamahalaan?

naluluha ako sa mga nangyayari

bansa'y mayaman, mamamayan ay pulubi

manggagawa'y kayod-kalabaw araw-gabi

habang kurakot sa bayan daw nagsisilbi

minamata nga ng matapobre ang pobre

sarili'y sinasalba ng trapong salbahe

sistema na'y binubulok, iyan ang siste

di na ganadong mapagana ang granahe

dahil sa ayuda trapo na'y iboboto

pera-pera na lang upang trapo'y manalo

kaya ngayon pa lamang ay isisigaw ko:

serbisyo sa tao, huwag gawing negosyo!

- gregoriovbituinjr.

12.14.2025

Bawal pumasok sa Marunong St.

BAWAL PUMASOK SA MARUNONG ST.

bawal pumasok sa Daang Marunong

sakaling baha, sana'y makalusong

sakaling bagyo, sana'y makasulong

sa problema, baka may makatulong

kung nasok roong luha'y bumabalong

ako'y kakain sa platong malukong

ulam ko'y galunggong sa kaning tutong

habang asam ko'y korap na'y makulong

walang kapilya, bisita o tuklong

na pupuntahan sa Daang Marunong

ang meron, lasing na bubulong-bulong

kayraming alam, madalas magtanong:

sa flood control bakit laksa'y nalulong?

paano mababatid ang himatong?

sa ibinulgar ng mga kontrakTONG?

may mga ulo na kayang gugulong?

buti pa ang asong umaalulong

nakakapasok sa Daang Marunong

sa kantong iyon lamang nakatuntong

pag nasok, ako kaya'y makukulong?

- gregoriovbituinjr.

12.14.2025

Tambúkaw at Tambulì

TAMBÚKAW AT TAMBULÌ

nais kong maging pamagat

ng aklat ng aking akdâ

ang salitang nabulatlat

na kayganda sa makatâ

ang "Tambúkaw at Tambulì"

mga gamit noong una

mga hudyat sa taguri

na kaysarap gamitin pa

isama sa mga kwento

anong banghay o salaysay

o nobelang gagawin ko

ay, dapat iyong manilay

marapat ko nang planuhin

nang maisakatuparan

ang pangarap na gagawin

plano'y dapat nang simulan

- gregoriovbituinjr.

12.14.2025

* litrato mula sa Diksiyonaryong Adarna, p.900

Alahoy!

ALAHOY!

parang wala nang kabuhay-buhayy

aring buhay kapag naninilay

para bang nabubuhay na bangkay

na hininga'y hinugot sa hukay

may saysay pa ngâ ba yaring búhay

kung sa tula't rali nabubuhay

mabuti yata'y magpakamatay

nang sinta'y makapiling kong tunay

tula na lang ang silbi ko't tulay

tula'y tulay sa di mapalagay

sa mundô ba'y ano pa ang saysay

kung nabubuhay lagi sa lumbay

wala bang magpapayo? Alahoy!

wala bang kaibigan? Alahoy!

wala na ba ang lahat? Alahoy!

ako nga ba'y patay na? Alahoy!

- gregoriovbituinjr.

12.13.2025

* Alahoy! - mula sa Diksiyonaryong Adarna, p.21

Kapoy

KAPOY

walâ na bang makatas sa diwà

ng makata't di na makatulâ?

bakit pluma'y tumigil na sadyâ?

ang unos ba'y kailan huhupà?

ilang araw ding di nakákathâ

leyon at langgam man sa pabulâ

ay di ko pa napagsasalita

may delubyo kayang nagbabadyâ?

di makapag-isip? namumutlâ?

gayong naglulutangan ang paksâ

sa lansangan, dibdib, libog, luhà,

tuhod, ulo, ere, dagat, bahâ

panga, pangat, pangatlo, pawalâ

talampakan, basura, bahurà

talapihitan, dukhâ, dalitâ

palatuldikan, makata'y patdâ

labas na, makatang maglulupâ

sa iyong silid, yungib o lunggâ

hanggang pagkatulala'y mapuksâ

at kapoy ay tuluyang mawalâ

- gregoriovbituinjr.

12.13.2025

Alas-dose na bumangon

ALAS-DOSE NA BUMANGON

madalas, kay-aga nang babangon

madaling araw, gising na ako

ngayon, alas-dose na bumangon

pahinga muna, pagkat Sabado

madalas, maaga pa'y lalabas

at maglalakad na ng malayò

upang damayan ang nag-aaklas

na obrero't dukhang nasiphayò

tanghaling bumangon, kumathâ na

ng iilang may sukat at tugmâ

iyan ang bisyong yakap talaga

at gawain ng abang makatâ

mamaya'y lalabas buong gabi

diringgin ang kapwa manunulat

sa panayam niya't masasabi

sa kanyang paksang isisiwalat

- gregoriovbituinjr.

12.13.2025

Pagtatása at Pagtatasá (Assessment and Sharpening)

PAGTATÀSA at PAGTATASÁ

(Assessment and Sharpening)

pag natapos ang plano at mga pagkilos 

ay nagtatàsa o assessment nang maayos

kung ang pagtatasá o sharpening ba'y kapos?

at nakinabang ba ang tulad kong hikahos?

kaya mahalaga ang dalawang nabanggit

kung pagtatása o sharpening ba'y nakamit?

sa pagtatasá o assessment ba'y nasambit?

anong mga aral ang dito'y mabibitbit?

mga plinano'y di dapat maging mapurol

sa planong matalas, di sayang ang ginugol

sa assessment ba'y ano kayang inyong hatol?

buong plano ba'y naganap? wala bang tutol?

tingnan mo lang ang tuldik sa taas ng letra

at ang salita'y mauunawaan mo na 

kayâ ngâ ang pagtatása at pagtatasá

sa bawat organisasyon ay mahalaga

- gregoriovbituinjr.

12.12.2025    

Ayokong mabuhay sa utang

AYOKONG MABUHAY SA UTANG

ayokong mabuhay na lang

upang magbayad ng utang

tulad sa kwentong "The Necklace"

nitong si Guy de Maupassant

subalit kayraming utang

na dapat ko pang bayaran

ako'y nabubuhay na lang

upang magbayad ng utang

kayâ buô kong panahon

sa bawat galaw ang layon

paano bayaran iyon

buong buhay ko na'y gayon

habang kayraming kurakot

mga pulitikong buktot

kaygandang buhay ng sangkot

silang sa bayan ay salot

ikinwento ni Maupassant

sadyang wala ka nang buhay

kumikilos parang patay

nabubuhay parang bangkay

di matulad kay Mathilde

Loisel sa akdang "The Necklace"

yaong nais ko't mensahe

sa kapwa ko't sa sarili

sa tulad kong pulos utang

tama ka, Guy de Maupassant:

ang nabubuhay sa utang

ay wala nang kasiyahan

- gregoriovbituinjr.

12.12.2025

* litrato mula sa google    

Tulawit: KAMI'Y DATING BILANGGONG PULITIKAL

Tulawit: KAMI'Y DATING BILANGGONG PULITIKAL

(kinathâ upang awitin)

kami'y dating bilanggong pulitikal

na adhikain sa bayan ay banal

na layunin sa bayan ay marangal

na may taglay na disiplinang bakal

kumilos upang lumayà ang bayan

sa kuko ng dinastiya't gahaman

sa pangil ng buwaya at kawatan

sa sistemang bulok at kaapihan

tinuring na kaaway ng gobyerno

at kinulong sa gawa-gawang kaso

gayong naging aktibistang totoo

nang di pagsamantalahan ang tao

nilabanan ang bulok na sistema

panawaga'y panlipunang hustisya

nilabanan ang sistemang baluktot

kalaban ngayon ay mga kurakot

tuloy ang laban tungong pagbabago

itayô ang lipunan ng obrero

lipunang patas, pantay, makatao

lipunang walang kawatan at trapo

- gregoriovbituinjr.

12.12.2025

* litrato mula sa google

Pipikit na lang ang mga mata ko

PIPIKIT NA LANG ANG MGA MATA KO

pipikit na lang ang mga mata ko

upang matulog ng himbing na himbing

napapanaginipa'y paraiso

na lipunang makatao'y kakamtin

aba'y kayganda ng panaginip ko

na para bang ako'y gising na gising

umalwan ang buhay sa bansang ito

ginhawa ng dukha'y natamo na rin

wala nang namamayagpag na trapo

walang dinastiya't oligarkiya

na nagpapaikot ng ating ulo

na masa'y dinadaan sa ayuda

lipunan na'y binago ng obrero,

ng mga aping sektor ng lipunan

pagpupugay sa uring proletaryo

pagkat binago ang sandaigdigan

pipikit na lang ang mga mata ko

kung sa pagbaka'y napagod nang ganap

kung nais nang magpahinga ng todo

kung natupad na'y lipunang pangarap

- gregoriovbituinjr.

12.11.2025

Di magsasawang magrali hangga't may api

DI MAGSASAWANG MAGRALI HANGGA'T MAY API

abang makata'y di magsasawang magrali

misyon: gálit ng masa'y gatungang matindi

lalo't sa katiwalian di mapakali

ngingisi-ngisi lang ang mga mapang-api

"Ikulong na 'yang mga kurakot!" ang hiyaw

dahil sa mga buktot na trapong lumitaw

tingni ang bansa, parang gubat na mapanglaw

para bang masa'y tinarakan ng balaraw

huwag magsawang magrali hangga't may api

hangga't may mga trapo pang makasarili

at dinastiya'y naghahari araw-gabi

panahon nang lipulin silang mga imbi

di dapat manahimik, tayo nang kumilos

laban sa korap na trapong dapat maubos

baguhin ang sistema'y misyon nating lubos

upang bayan ay guminhawa't makaraos

- gregoriovbituinjr.

12.11.2025

Ilang araw ding di nakatulâ

ILANG ARAW DING DI NAKATULÂ

binalak kong sa bawat araw ay may tulâ

sa mga nakaraang buwan ay nagawâ

ngunit ngayong Disyembre'y nawalan ng siglâ

ilang araw ding iba ang tuon ng diwà

huli kong tula'y ikalima ng Disyembre

nakatulâ lang ngayong Disyembre a-Onse

aking tinatása ang loob at sarili

bakit nawalan ng siglâ, anong nangyari?

naging abala sa Lunsad-Aklat? pagdalo

sa Urban Poor Solidarity Week, a-otso

sunod, International Anti-Corruption Day

a-Diyes ay International Human Rights Day

napagod ang utak, maging yaring katawan

mahabang pahinga'y dapat na't kailangan

ngunit pagkatha'y huwag nawang malimutan

ng makatang ang búhay na'y alay sa bayan

- gregoriovbituinjr.

12.11.2025

Panagimpan

PANAGIMPAN

nanaginip akong tangan ang iyong kamay

ngunit nagmulat akong wala palang hawak

alas-tres ng madaling araw na'y nagnilay

kung anong kahulugang sa isip naimbak

aking sinta, mula nang ikaw ay pumanaw

nahihimbing akong kayraming nalilirip 

nararamdaman ko pa rin ang pamamanglaw

at sumasagi kang bigla sa aking isip 

narito akong ginagampanan ang misyon

at tungkulin dito sa bayang sinumpaan

batid kong ginagabayan mo ako ngayon

na payo'y huwag pabayaan ang katawan

di ko hahayaang ang masang umaasa

ay maiwanan na lamang sa tabi-tabi

salamat, sa panaginip ko'y dumalaw ka

habang ako'y nagsisilbing tinig ng api

- gregoriovbituinjr.

12.05.2025

* larawan mula sa google

Kanin at toyo lang sa pananghalian

KANIN AT TOYO LANG SA PANANGHALIAN

minsan, ganito lamang ang pananghalian

lalo na't walang-wala talagang pagkunan

minsan, maayos ang agahan o hapunan

pag nakaluwag-luwag, na bihira naman

maraming salamat sa nakauunawa

sa kalagayan naming mga walang-wala

mga maralitang madalas naglulupa

upang makausap lamang ang kapwa dukha

minsan, kanin at toyo; minsan, may kamatis

minsan nama'y tuyong hawot na maninipis

kung walang toyo o asin, madalas patis

ganyan ang tibak na Spartan kung magtiis

buti't walang sakit na siyang mahalaga

sa mga rali'y dumadalo pa talaga

katawan nama'y di pinababayaan pa

kumakain ng gulay, okra, kalabasa

- gregoriovbituinjr.

12.04.2025

Tungkulin nating di manahimik

TUNGKULIN NATING DI MANAHIMIK

batid mo nang korapsyon ang isyu ng bayan

subalit pinili mong manahimik na lang

huwag makisali sa rali sa lansangan

dahil tingin mo, ikaw lang ay madasaktan

ito na lang ang meron tayo: boses, TINIG

kung galit ka rin sa korapsyon, IPARINIG

ang mga kurakot ang nagpapaligalig

sa ating bayan, dukha'y winalan ng tinig

pakinggan natin ang lumalaban sa korap

si Catriona Gray, talumpati'y magagap

si Ka Kokoy Gan, na tinig ng mahihirap

si Atty. Luke Espiritu kung mangusap

dinggin mo ang tinuran ni Iza Calzado

na talumpati'y tagos sa pusò, totoo

pakinggan mo ang tinig ni Orly Gallano

ng lider-maralitang Norma Rebolledo

ilabas mo rin ang galit mo sa korapsyon

at likhain ang bagong kasaysayan ngayon

huwag nang manahimik sa silid mong iyon

makipagkapitbisig tayo't magsibangon

- gregoriovbituinjr.

12.04.2025

* litrato kuha ng makatang galâ sa Bahâ sa Luneta, Maynila, 11.30.2025

Pagsasabuhay ng pagiging pultaym

PAGSASABUHAY NG PAGIGING PULTAYM

ako'y isang tibak na Spartan

gaya noong aking kabataan

sinabuhay ang pagiging pultaym

bilang makata't tibak ng bayan

ang prinsipyo'y simpleng pamumuhay

pakikibaka'y puspusang tunay

sa ganyan ang loob ko'y palagay

sa prinsipyo ako pinatibay

pag sa pagiging tibak nawalâ

di na ako ang ako, tunay ngâ

sa anumang rali, laging handâ

pagkat lingkod ng obrero't dukhâ

di lang ako tibak sa panulat

kundi sa gawâ at nagmumulat

sa rali makikita mong sukat

kahit magutom o magkasugat

tumubo't laki sa aktibismo

ang makatang rebolusyonaryo

hangad ay lipunang makatao

na lahat ay nagpapakatao

ako'y ako, oo, ako'y tibak

sistemang bulok ay ibabagsak

pinagtatanggol ang hinahamak

kahit ako'y gumapang sa lusak

- gregoriovbituinjr.

12.04.2025

Pagtindig sa balikat ng tandayag

PAGTINDIG SA BALIKAT NG TANDAYAG

"If I have seen further, it is by standing on the shoulders of giants. (Kung mas malayò pa ang aking natanaw, iyon ay dahil sa pagtayô sa balikat ng mga tandayag.)" ~ Isaac Newton 

isa iyon sa natutunan kong prinsipyo

mula sa agham na hanggang ngayon, dala ko

sa rali man o pagkathâ ng tula't kwento

sa paglalakad man ng kilo-kilometro

sa paglalakbay man habang sakay ng barko

sa pangibang bayan sakay ng eroplano

nasa balikat ng tandayag o higante

nakatayong kaytatag, búhay man ay simple

kayraming paksa'y yakap sa araw at gabi

kayraming isyu kayâ sa bayan nagsilbi

sa mga walang-wala, laging sinasabi:

sistema'y baguhin, nang walang inaapi

nakatindig pa rin ako ng buong tapat

sa balikat ng tandayag at nagmumulat

sa masa na pakikipagkapwa'y ikalat

dapat ikulong na 'yang mga rapong bundat

na pondo ng bayan ang kanilang kinawat

bitayin sila kung kulong ay di na sapat

- gregoriovbituinjr.

12.04.2025

* litrato mula sa google

Naharang bago mag-Mendiola

NAHARANG BAGO MAG-MENDIOLA

naharang bago mag-Mendiola

matapos ang mahabang martsa

mula Luneta sa Maynilà

araw ng bayaning dakilà

subalit di kami natinag

mahaba man yaong nilakad

mga barb wire ang nakaharang

container pa'y nakahambalang

takot na ang mga kurakot

bantay saradong mga buktot

habang masa'y nagsidatingan

kurakot, ikulong! hiyawan

"PNP, protektor ng korap!"

at mga trapong mapagpanggap

sigaw iyon ng masang galit

mga kurakot na'y ipiit

- gregoriovbituinjr.

12.03.2025

* bidyo kuha noong 11.30.2025

* mapapanood ang bidyo sa kawing na: https://www.facebook.com/share/v/1GYjGbj1yK/     

Buti't may tibuyô

BUTI'T MAY TIBUYÔ

kulang ang pamasahe kahapon

mula Cubao patungong Malabon

upang daluhan ang isang pulong

buti't nagawang paraan iyon

di ako nanghingi kaninuman

di rin nakabale sa sinuman

talagang walang mahihiraman

buti't mayroong mapagkukunan

sa aking tibuyô o alkansya

na pinag-iipunan tuwina

doon muna nanghiram ng pera

dagdagan na lang pag umalwan na

minsan ganyan ang abang makatâ

upang marating pa rin ang madlâ

sa pulong na dinaluhang kusà

di umabsent sa misyong dakilà

- gregoriovbituinjr.

12.03.2025

* ang tibuyô ay salitang Batangas sa Kastilang alkansya

Paglahok sa rali

PAGLAHOK SA RALI

bakit di ka pupunta sa rali?

dahil lang wala kang pamasahe?

kung ako, sisimulang maglakad

nang makarating at mailadlad

ang plakard na laman yaong isyu

ng bayan, at makalahok ako

sa rali, wala mang pamasahe

gagawan ng paraan, ganire

o ganyang sanhi, walang alibay

lalakarin ang mahabang lakbay

mahalaga ang prinsipyong tangan

pamasahe'y gawan ng paraan

mahalaga'y lumahok sa rali

kahit kapos pa sa pamasahe

ikulong na 'yang mga kurakot!

lahat ng sangkot, dapat managot!

- gregoriovbituinjr.

12.03.2025

* kasama sa litrato si David D'Angelo, dalawang beses na tumakbong Senador

* salamat sa kumuha ng litrato, kuha noong 11.30.2025 sa Luneta

Bahâ sa Luneta, 11.30.2025

BAHÂ SA LUNETA, 11.30.2025

bahâ sa Luneta

ng galit na masa

laban sa kurakot

at lahat ng sangkot

bumaha ang madlâ

upang matuligsâ 

yaong mga buktot

na nangungurakot

sa kaban ng bayan

imbes paglingkuran

ang masa, inuna

ay sariling bulsa

ikulong ang lahat

ng trapong nabundat

sila'y panagutin

sa ginawang krimen

ang nakaw na pondo

ibalik sa tao

trapong mandarambong

ay dapat ikulong

- gregoriovbituinjr.

12.03.2025

* ang litrato'y kuha ng makatang galâ

Hapunan ko'y potasyum

HAPUNAN KO'Y POTASYUM

taospusong pasasalamat

sa nagbigay nitong potasyum

tiyak na rito'y mabubundat

bigay mula sa isang pulong

dalawang turon ang narito

at dalawang tila maruya

kailangan talaga ito

ng katawan kong kaynipis nga

pampalakas daw nitong puso

pati na ng mga kalamnan

pangontrol ng presyon ng dugo

pabalanse rin ng katawan

kaya di na ako nagsaing

di na rin bumili ng ulam

dahil sapat na itong  saging

na sa gutom ko'y nakaparam

salamat sa potasyum na bigay

sapagkat may panghapunan na

upang makakatha pang tunay

ng tulang tulay ko sa masa

- gregoriovbituinjr.

12.02.2025

Ano ang lihim ng kalihim o sekreto ng sekretaryo?

ANO ANG LIHIM NG KALIHIM O SEKRETO NG SEKRETARYO?

ano nga ba ang inililihim

ng kalihim, o ng sekretaryo?

salitang sadyâ bang isinalin

ng direkta, lihim at sekreto?

kung nagpi-preside ay presidente

dahil ang pangulo ang pang-ulo

nasa katawagan ang mensahe

nasa salitâ kung sila'y sino

tulad ko, sekretaryo heneral

ng dalawa kong organisasyon

iyan ang titulo nang mahalal

sa samahang may bisyon at misyon

magtago ng lihim ang kalihim

na may kinalaman sa samahan

mangalap ng datos na malalim

mga isyu't problema ng bayan

may sekreto rin ang sekretaryo

na sadyang kapaki-pakinabang

yaong pagsusulat ng minuto

kaalaman ng masa'y malinang

marami pang lihim ang kalihim

mga sekreto ng sekretaryo

bakit kaya siya naninimdim?

masakit ba'y ang pusò o ulo?

- gregoriovbituinjr.

12.02.2025

Nagkamali ako ng bayad, buti't ang konduktor ay tapat

NAGKAMALI AKO NG BAYAD, BUTI'T ANG KONDUKTOR AY TAPAT

Akala ko'y baryang P20 + P5 + tatlong P1 equals P28 ang aking ibinayad sa konduktor. Buti't honest siya. Binigyan niya ako ng P5 sukli. Nagtaka ako.

Sabi niya, binigay ko'y P33. At P28 lang ang pamasahe mula Monumento hanggang Cubao. Ang naibigay ko pala'y P20 + P10 + tatlong P1 equals P33. Imbes P5, ang naibigay ko pala'y baryang P10.

Nalitô ako roon, ah. Nagawan ko tuloy ng tulâ ang karanasang ito:

salamat sa konduktor na tapat

binalik ang limang pisong labis

di kasi ako naging maingat

dahil nagbabayad ng mabilis

bus carousel mula Monumento

hanggang Cubao Main ang pamasahe

ay dalawampu at walong piso

ngunit sobra ang bigay ko, sabi

naibigay ko'y trenta'y tres pesos

imbes na bente otso pesos lang

katapatan niya'y nakamenos

sa pamasahe, di mapanlamang

maraming namatay sa akala

limang piso pala'y sampung piso

kaya sobra'y binalik na sadya

nagkamali ng akala ako

kaya taos na pasasalamat

ang sa kanya'y ipinaaabot

dapat gantimpalaan ang tapat

buti't di siya trapong kurakot

- gregoriovbituinjr.

12.02.2025

Dating plakard, petsa lang ang binago

DATING PLAKARD, PETSA LANG ANG BINAGO

dating plakard na gamit ng Nobyembre

na binago lang, ginawang Disyembre

di pa rin nagbabago ang mensahe

ikulong na ang korap na salbahe

wala pa kasing napaparusahan

na nangurakot sa pondo ng bayan

baka Pasko'y wala pa sa kulungan

silang mga namburiki sa kaban

paghandaan nati'y magandang bukas

itayo ang isang lipunang patas

kung saan ang tao'y pumaparehas

wala nang trapong sa bayan naghudas

Disyembre na, wala pang napipiit

patuloy na pag-alabin ang galit

ng masa sa korap na nang-uumit

sa pondo ng bayan, buwis at badyet

- gregoriovbituinjr.

12.01.2025

Disyembre na, walâ pang nakukulong na kurakot

DISYEMBRE NA, WALÂ PANG NAKUKULONG NA KURAKOT

Disyembre na, walâ pang nakukulong na kurakot

baka mag-Pasko tayong ngingisi-ngisi ang buktot

masasaya pa rin silang ang mundo'y nililibot

habang masa'y naghihirap pa rin, nakalulungkot

kasya ba ang limangdaang piso sa Noche Buena?

gaya ng ipinapayo ng gobyerno sa masa

habang silang mga kabilang sa oligarkiya

may pitong daang libong piso bawat kain nila

pondo na ng bayan ang binuriki ng kawatan

sana ngayong DIsyembre bumigwas muli ang bayan

International Anti-Corruption Day, December 9

upang singilin ang mga pulitikong gahaman

dahil sa mga kurakot, nalulunod sa bahâ

ang mga kababayan nating nagdurusang lubhâ

dapat managot sa bayan ang mga walanghiyâ

dapat pagpalit ng sistema'y paghandaang sadyâ

mag-Paskong nagrarali sa Mendiola, paskong tuyó

hangga't walang makulong na korap ay di susuko

ang bayan upang panagutin ang mga hunyangò

at korap, pati na kanilang pinakapinunò

- gregoriovbituinjr.

10.03.2025

Pagpunta sa apat na lugar ng protesta

PAGPUNTA SA APAT NA LUGAR NG PROTESTA

mula Luneta, Mendiola, Edsa Shrine hanggang PPM

ay inikot ko ang mga iyon upang ikampanya

ang December 9 International Anti-Corruption Day

nagbabakasakaling mapabatid sa taumbayan

ang pandaigdigang araw laban sa katiwalian

ang apat na lugar ng protesta'y aking pinuntahan

habang tangan ko yaong tarpolin na magkabilaan

nalitratuhan, nabasa ng tanan, kinapanayam

paalalang ang UN ay may petsang pandaigdigan

laban sa mga mandarambong, kurakot at gahaman

umaga, Luneta; tanghali, Mendiola; hapon, Edsa

Shrine at PPM hanggang gabi, sana nama'y magbunga

ang kapangahasan ko't magsilabasan sa kalsada

lahat ng galit sa kurakot at bulok na sistema

wakasan ang korapsyon, hanggang makamtan ang hustisya

- gregoriovbituinjr

11.30.2025

* ang unang litrato ay kuha ni kasamang Warren nang magkita kami sa People Power Monument (PPM) ng hapon ng Kaarawan ni Bonifacio, ang ikalawa'y selfie ng makatang galâ

Yaman ng taas, galing lahat sa ibaba!

YAMAN NG TAAS, GALING LAHAT SA IBABA!

pinanood ko ang kanilang pagtatanghal

at napukaw ako sa kanilang liriko:

"Yaman ng taas, galing lahat sa ibaba!"

katotohanang dapat nating isadiwa

buti't binidyo ko ang pagtatanghal nila

upang katotohanan sa kanilang kanta

ay maibahagi sa malawak na masa

na nais mabago ang bulok na sistema

nabidyo ko sila sa screen sa Edsa Shrine

habang naroon ang mga senior citizens

nagtanghal ay nasa People Power Monument

kaya sa P.P.M. ako'y nagtungo na rin

sa Morobeats, taaskamaong pagpupugay

kayong rapper sa masa'y talagang kahanay

kalagayan ng madla'y batid ninyong tunay

kaya mga inawit n'yo'y buhay na buhay

mga inawit nila'y ating pagnilayan:

"Yaman ng taas, galing lahat sa ibaba!"

yumaman ang taas sa pagsasamantala

sa manggagawa, magsasaka, maralita

kaya dapat baguhin ang sistemang bulok

huwag nang iboto ang mga trapong bugok

galing sa masa'y ating ilagay sa tuktok

upang pagsasamantala'y lagyan ng tuldok

- gregoriovbituinjr.

11.30.2025

* mapapanood ang bidyo sa kawing na: https://www.facebook.com/share/v/1AAwnWj86Q/ 

Tayo'y mga anak ni Bonifacio

TAYO'Y MGA ANAK NI BONIFACIO

ngayong araw ng bayaning Gat Andres Bonifacio

ipakitang tunay na mga anak niya tayo,

anak ng bayan, ayon iyan sa tagapangulo

ng Partido Lakas ng Masa, Ka Sonny Melencio

Supremo'y di bulag o pipi, o kaya'y nahiya

pagkat kanyang tinatag ang Katipunang dakila

nang wakasan ang pagsasamantala ng Kastila

upang bayan ay mag-alsa't tuluyan nang lumaya

salamat, Ka Sonny, sa paalala mo sa amin

kaya mga kurakot ay binabatikos man din

ang mga buwaya't buwitre sa gobyerno natin

ay raralihan, tutuligsain, papanagutin

hanggang kamtin ng bayan ang asam ng Katipunan

na malayang bansang walang mapang-api't gahaman

na walang tiwali't kurakot sa pondo ng bayan

di makakapamuno ang kurakot at kawatan

sila'y di na natin hahayaang magsamantala

di na dapat mamayagpag ang mga dinastiya

di naman tayo mararahas basta may hustisya

ang nais lang natin ay makatarungang sistema

- gregoriovbituinjr.

11.30.2025

Sa kaarawan ng Supremo

SA KAARAWAN NG SUPREMO

ako'y taga-Sampaloc

at siya'y taga-Tondo

na noon pa'y naarok

ang asam na gobyerno

makataong lipunan

di bulok na sistema 

paglingkuran ang bayan

di mga dinastiya

si Andres Bonifacio

ay dakilang bayani

sa kanya nga'y saludo

yaong ayaw paapi

at pagsamantalahan

ng mga mapanupil

na dayo't kababayan

di sila pasisiil 

sa Kastila lumaban

di nagpatumpik-tumpik

ngunit siya'y pinaslang

ng kapwa nanghimagsik

sa'yo, Gat Andres, kami'y

taos na pagpupugay

iyong pagkabayani'y

aming sinasabuhay

karaniwang tao man

ang tulad kong makatâ

naglilingkod sa bayan

upang masa'y lumayà

sa bulok na sistema

at dinastiyang sukab

ang saysay mo't pamana

sa puso'y nagpaalab

- gregoriovbituinjr.

11.30.2025

Pagkaing Palestino sa hapunan

PAGKAING PALESTINO SA HAPUNAN

bukod sa shawarma, minsan lang ako makatikim

ng mga pagkaing Palestino, na tulad nito

may halong mani, makulay at mahaba ang kanin

masarap, malasa, isang ito'y nagustuhan ko

may nagtindang half-Filipino at half-Palestinian

sa rali, International Day of Solidarity

with the Palestian People, kami'y kaisa naman

nila ngayong araw ng Nobyembre Bente-Nuwebe

sa nanlibre sa amin, kami'y nagpapasalamat

nireserbang panghapunan kaya may naiuwi

sadyang nakabubusog habang may nadadalumat

na sa tahanan pala'y mayroon akong kahati

nang ako'y dumating, nagngiyawan ang mga pusa

ngunit gabi na nang kinain ko ang aking baon

kaya natira sa manok ang aking inihanda

upang mga tambay na alaga'y di rin magutom

- gregoriovbituinjr.

11.29.2025

Taas-kamao

TAAS-KAMAO

nagpupugay ako sa lahat ng dadalo

sa pagkilos ng masa sa Nobyembre Trenta

laban sa mga kurakot na pulitiko

masa'y lumahok man sa Luneta o Edsa

tungong pangarap na lipunang makatao

tungong pangarap na mabago ang sistema

na mawalâ ang mga buktot sa gobyerno

na mawalâ ang mismong kurakot talaga

pagsaludo, taas-kamaong pagpupugay

dahil nagpapatuloy ang ningas ng galit

ng masa, huwag itong hayaang mamatay

dahil ginawa sa bansa'y napakalupit

dapat mapanagot ang mga walanghiyâ!

sigaw natin: ikulong lahat ng kurakot!

lalo't trapo't dinastiya'y kasumpa-sumpâ

tiyaking mga sangkot ay di makalusot

- gregoriovbituinjr.

11.29.2025

Lunsad-aklat sa rali

LUNSAD-AKLAT SA RALI

Nailunsad din ang 40-pahinang aklat kong "Malayang Salin ng mga Tulâ ng Makatang Palestino" ngayong Nobyembre 29, 2025, International Day of Solidarity with the Palestinian People, sa pagkilos ng iba't ibang grupo kaninang umaga sa Liwasang Bonifacio sa Maynilâ.

Isa ako sa mga nagbigay ng pahayag sa pamamagitan ng pagtulâ. May iba ring bumigkas ng tulâ, umawit at sumayaw. Kasabay ng paglulunsad ng aklat ay binigkas ko roon ang tulang "Isulat n'yo po ang pangalan ko sa aking binti, Inay" na salin ko ng tulâ ng makatang Palestinong si Zayna Azam, at binigkas ko rin ang isa pang tulang katha ko hinggil sa pakikibaka ng mga Palestino.

Maraming salamat sa lahat ng mga sumuporta at bumili ng munti kong aklat ng salin ng tula ng mga makatang Palestino. Mabuhay kayo!