Sa araw ng paggawa

Sabihin mo sa aking tamad ang mga obrero
At tiyak na makikita mo ang hinahanap mo
Ang manggagawa ang umuukit ng buong mundo
Ramdam iyon ng lahat, na di matanggap ng tuso
At ganid sa lipunang yakap ay kapitalismo.

Walang pang-aapi't pagsasamantala, pangarap
Ng uring manggagawang nasadlak sa dusa't hirap
Gagawin lahat upang bawat isa'y magsilingap
Pati problema ng masa'y kanilang hinaharap
At gumagawa ng solusyon sa problemang lasap.

Gusto ng obrero'y maging pantay ang kalagayan
Ganap na pagbabagong adhika ng mamamayan
At gabay din ng masa upang matutong lumaban
Wawasaking lubos ang kapitalismong gahaman
At itatatag ang makamanggagawang lipunan.

- gregbituinjr.
04.30.2020

Sa bisperas ng Araw ng Paggawa

dapat ay katapusan na ng kwarantina ngayon
petsa Abril a-trenta, nagbago na't may ekstensyon
petsa Mayo a-kinse ang bago nilang suhestyon
kalahating buwan pang kulong sa bahay maghapon

bisperas pa naman ngayon ng Araw ng Paggawa
ng pandaigdigang araw ng uring manggagawa
kahit nasa lockdown man, magdiriwang sa gunita
bukas, alalahanin ang proletaryong dakila

may ekstensyon man, tuloy ang gampanin at pagkilos
sa anumang paraan, gawa'y nilulubos-lubos
na mabago pa rin ang sistemang mapambusabos
at mapagkaisa ang manggagawang dukhang kapos

katapusan na ng buwan, anong nababanaag?
may bagong pag-asa ba o buhay pa rin ay hungkag?
"flatten the curve", sana kurba'y tuluyan nang mapatag
upang madamang ang kalooban na'y pumanatag

- gregbituinjr.
04.30.2020

Munting pagtalakay sa Bayanihan to Heal as One Act of 2020

Munting pagtalakay sa Bayanihan to Heal as One Act of 2020

Sinaliksik ni Greg Bituin Jr.

Ang Batas Republika Blg. 11469 o ang Bayanihan to Heal as One Act of 2020, ay naisabatas noong Marso 24, 2020, at naging epektibo noong Marso 25, 2020. Ito na yata ang pinakamabilis na panukalang naisabatas sa kasaysayan. Pang-Guinness Book of World Records, ika nga.

Sa Senado, ipinakilala nina Senador Tito Sotto, Pia Cayetano, Win Gatchalian, et.al., ang Senate Bill No. 1418, at naipasa ang 1st, 2nd, at 3rd Reading ng isang araw lang, Marso 23, 2020. Sa Kongreso, inihain ang House Bill No. 6616 nina Speaker Alan Peter Cayetano, et.al., at naipasa rin ang 1st, 2nd, at 3rd reading sa parehong araw, Marso 23, 2020. Kinabukasan, Marso 24, 2020, ay agad itong pinirmahan ni Pangulong Duterte.

Ang nasabing batas ay nagbibigay ng "additional authority" o dagdag na kapangyarihan sa pangulo "to combat" o upang malabanan ang "2020 coronavirus pandemic in the Phililpines". Nasa 14 na pahina ang buong Bayanihan Act at mada-download ang pdf file nito sa internet.

Ayon sa batas, dapat mag-sumite ng lingguhang ulat ang Pangulo sa Kongreso tuwing Lunes hinggil sa lahat ng mga gawang batay sa batas na ito pati ang halaga  at  kaukulang  paggamit  ng pondo. Bubuo naman ang Kongreso ng Joint Congressional Oversight Committee na binubuo ng apat na miyembro sa Senado at sa Kapulungan ng Kinatawan (ayaw ng ilang kasamang nasa House of Representatives na tawagin itong Mababang Kapulungan dahil kapantay daw ito ng Senado).

Ang batas ay nagbibigay ng Pangulo ng Pilipinas ng kapangyarihan upang maipatupad ang pansamantalang mga hakbang para sa emerhensiyang pagtugon sa krisis na naganap ng COVID-19. Para sa mga lalabag, may parusang dalawang buwang pagkabilanggo o multang hindi bababa sa sampung libong piso (P10,000.00) ngunit hindi hihigit sa isang milyong piso (₱P1,000,000.00) o maaaring pare-hong ipataw sa nagkasala.

Gayunman, hindi kasama sa batas ang paglabag sa karapatang pantao, kahit sinabi ng pangulong “Shoot them dead” ang mga lalabag sa community quarantine. Binanggit ang Bill of Rights sa Seksyon 4. Authorized Powers, Titik z, sub-titik (ee): "Undertake such other measures as may be reasonable and necessary to enable the President to carry out the declared national policy subject to the Bill of Rights and other constitutional guarantees."

* Unang nalathala sa Taliba ng Maralita, ang opisyal na publikasyon ng Kongreso ng Pagkakaisa ng Maralitang Lungsod (KPML), isyu ng Abril 16-30, 2020, pahina 2.

Gaano karaming lupa ang kailangan ng tao?

Gaano karaming lupa ang kailangan ng tao?

pamagat pa lang ng aklat, nakakaintriga na
anong sagot sa tanong? ito ba'y pilosopiya?
"How much land does a man need?" ay pamagat at tanong pa
na magandang akda ni Leo Tolstoy mula Rusya

tanong bang ito'y tungkol sa pribadong pag-aari?
ilang lupa ang dapat mong ariin kung sakali?
libu-libong ektarya ba sa puso mo'y masidhi?
dahil ba sa lupa kaya maraming naghahari?

ilan bang lupa ang kailangan ng isang tao?
bibilhin? aagawin? palalagyan ng titulo?
pinalalayas ba ang dukha para sa negosyo?
at kapag yumaman na, sa pulitika'y tatakbo?

di ko pa tapos basahin ang nobela ni Tolstoy
sa pamagat pa lang, mapapaisip ka na tuloy
ilan na bang dahil sa lupa'y lumuha't nanaghoy?
ilan ang naging playboy, ilan ang naging palaboy?

pag wala ka bang lupa, ang buhay mo na'y hilahod?
kaya pribadong pag-aari'y itinataguyod?
ideyang pyudal? magkalupa ba'y nakalulugod?
o lupa'y kailangan mo sa libingan mo't puntod?

- gregbituinjr.

Di sumusuko ang mandirigma

Di sumusuko ang mandirigma

"As a fighter, you don't give up." - Mphathi Rooiland

I
ang mandirigma'y mandirigma't di basta susuko
sabi ng estrangherong nilalakad ay kaylayo
walang pamasahe, gutom, ngunit di nasiphayo
sa adhikaing makasama ang kanyang kadugo

II
huwag susukuan ang kaunti mong suliranin
o kahit marami pa, ito'y may kasagutan din
sa pagharap sa problema, iyo munang suriin
tulad ng puzzle, chess o sudoku'y iyong lutasin

lagi mong isipin, may kalutasan din ang lahat
ng suliraning di mo matingkala't di mo sukat
akalaing daratal, gaano iyan kabigat?
paano't bakit sumulpot, saan iyan nagbuhat?

imbes layuan, gawin mo itong malaking hamon
na kaya mo itong malutas, maging mahinahon
tulad ng mandirigmang sumusuko paglaon
tatawa ka na lang, iyon lang pala ang solusyon

- gregbituinjr.

Problema'y disiplina, kamatayan ang parusa

Problema'y disiplina, kamatayan ang parusa

problema'y disiplina, kamatayan ang parusa

pasaway kasi ang mga nagugutom na masa

ang sabi ng pangulo, pasaway ay barilin na

at mga trigger-happy'y ginawa ang bilin niya

pareho silang sa dugo ng kapwa naglalaway

sa hazing kasi ang mga trigger-happy sinanay

kunwari'y walang alam sa karapatan at buhay

dahil pasaway kaya babarilin nilang tunay

sariling rules of engagement ay binabalewala

anang pangulo kasi, sagot niya ang maysala

sumunod lang sa asong ulol ang mga kuhila

basta sinabi ng boss nila, wala silang ngawa

problema'y disiplina, ang parusa'y kamatayan

solusyon nila'y pagpaslang sa problema ng bayan

solusyon lagi'y E.J.K. imbes na malunasan

ang sakit at kagutuman ng kapwa kababayan

- gregbituinjr.

04.23.2020

Agogo

AGOGO

marami kaming ang kariktan mo'y pinanonood
paggiling ng iyong katawan ay nakalulugod
sa patay-sinding kabaret nawawala ang pagod
sinasambang diwata sa kagubatan ng lungsod
kariktan mo'y sinisipat sa pagitan ng tuhod

tinadtad mo na ng kolorete ang iyong mukha
di ka na makilala kung talagang sino ka nga
habang kami sa paggiling mo'y napapatunganga
habang iba'y naglalaway, iba'y natutulala
sa pag-inom ng serbesa'y napapa-"isa pa nga"

uuwi din matapos iyon, babalik sa dati
pusikit ang karimlan, mananahimik ang gabi
maliligo't tatanggalin ang laksang kolorete
paggising, bibilangin ang kinita't pamasahe
sa pamilya'y may limang kilong bigas na pambili

ganoon ang buhay, kakahig upang may matuka
sisingilin muli ng kasera't mukhang kawawa
malapit na naman ang gabi, siya'y maghahanda
maglalagay ding muli ng kolorete sa mukha
sa kabaret na iyon, siya ang tinitingala

- gregbituinjr.

Gunam-gunamin mo ang sakit na kasumpa-sumpa

Gunam-gunamin mo ang sakit na kasumpa-sumpa

Gunam-gunamin mo ang sakit na kasumpa-sumpa
Gustong madalumat pagkat di iyon matingkala
Guniguni'y tila baga may asam na adhika
Gugulin ay di na mawari pagkat walang-wala

Gutom at di makapagtrabaho ang nangyayari
Gugupuin ang kalusugan nating di mawari
Gulo ito kung namumuno'y tila walang silbi
Gutay-gutay na pamumuhay sa dusa'y sakbibi

Guhong mga pangarap sa dibdib na'y halukipkip
Gubat na ang lungsod na animo'y di na malirip
Gunggong ang tusong trapong sarili lang ang inisip
Guwang sa polisiya nila'y ating nahahagip

Gulat man ang masa sa sakit na nananalasa
Gulantang man ang bayan sa biglaang kwarantina
Gulilat man tayo sa aksyon ng trapong paasa
Gusot ay maaayos pag nalutas ang pandemya

- gregbituinjr.

Giliw, ikaw ang mutya niring pusong sumisinta

Giliw, ikaw ang mutya niring pusong sumisinta

Giliw, ikaw ang mutya niring pusong sumisinta
Gitling man ay di namagitan sa ating dalawa
Giikin natin ang palay nang may buong pag-asa
Gilik sa palay ay iwasang mangati sa paa

Gipit man ngayon ay patuloy kitang nagsisikap
Giti man ang pawis sa noo'y laging nangangarap
Gitata sa sipag nang kaalwanan ay malasap
Ginhawang anong ilap ay atin ding mahahanap

Giray-giray man sa daan, tutupdin ang pangako
Giyagis man ng hirap ay di rin tayo susuko
Giwang sa adhika'y suriin nang di masiphayo
Ginisang anong sarap ay atin ding maluluto

Gising ang diwang di payag mapagsamantalahan
Giting ng bawat bayani'y kailangan ng bayan
Giit natin lagi'y wastong proseso't karapatan
Gibik na kamtin ng masa'y hustisyang panlipunan

- gregbituinjr.

Garapalan na ang nangyayaring katiwalian

Garapalan na ang nangyayaring katiwalian

I
Garapalan na ang nangyayaring katiwalian
Gahaman at tuso'y napaupo sa katungkulan
Ganid na pawang pahirap sa laksang mamamayan
Garapata silang nasa likod ni Kalakian
Garote'y dapat sa tulad nilang taksil sa bayan

II
Gawa ng magulang upang anak ay di bumagsak
Gagapang upang mapagtapos lang ang mga anak
Garantiyang pag napagtapos ay labis ang galak
Ganansyang may kinabukasan, di naging bulagsak
Gantimpala na itong nagbunga rin ang pinitak

III
Gaygayin ang laot tungo sa pulo ng mabuti
Gaod sa balsa'y gamitin mong wasto't magpursigi
Gampanan ang misyon habang bawat mali'y iwaksi
Gagayak tungo sa islang walang mga salbahe
Galak ang madarama sapagkat wala ring peste

IV
Garalgal na ang pananalita't di makangawa
Garil ang tinig sa isyu't problemang di humupa
Gamol man siyang laging sakbibi ng dusa't luha
Gatla sa noo'y tandang marami pang magagawa
Gawin lagi sa kapwa kung anong mabuti't tama

- gregbituinjr.

Ngumiti ka rin, huwag laging magmukmok

Ngumiti ka rin, huwag laging magmukmok

minsan, kailangan ding ngumiti, huwag magmukmok
sa isang tabi, dinanas mo man ay isang dagok
may magagawa ka pa kung ramdam mo'y pagkalugmok
dahil bawat umaga'y may pag-asang nilililok

halina't buong umaga'y punuin mo ng ngiti
matagal man ay maghihilom din ang bawat hapdi
lutasin ang suliranin mula ugat o sanhi
at sa puso't tanggalin ang ngitngit at pagkamuhi

salubungin mong nakangiti ang bagong umaga
isapuso mo't isadiwang may bagong pag-asa
at damhin ang hanging amihan kasama ang sinta
malulutas din ang kaharap mong isyu't problema

di laging sa likod mo'y nakatarak ang balaraw
di ka laging nasa dilim, may darating ding tanglaw
problema mo'y matatapos pag ikaw na'y gumalaw
manganak man muli ng problema'y may bagong araw

- gregbituinjr.

Magugutom ka ngunit gagawa ka ng paraan

Magugutom ka ngunit gagawa ka ng paraan

magugutom ka ngunit gagawa ka ng paraan
anumang mga ginagawa'y tiyak mong iiwan
maghahanap ng makakain, lalamnan ang tiyan
laking gubat man, gutom ay kaya nilang iwasan

"matter over mind", pag naramdaman mong kumakalam
ang sikmura'y tiyak hahanap ng kanin at ulam
laging nakaplano ang pagkain, ito na'y alam
kahit taong grasa'y di payag sikmura'y kumalam

mag-isip ng paraan nang di magutom ang anak
walang namamatay sa gutom, igalaw ang utak
maraming namatay dahil tinokhang o sinaksak
subalit sa gutom, di namatay o napahamak

ang epekto ng gutom ay di kamatayan agad
magkakasakit muna, ulser? kanser? malalantad
baka buong panahon mo'y sa ospital bababad
mamamatay ka sa ospital sa laki ng bayad

mga ibon nga sa himpapawid, nakakakain
ikaw pang taong may isip, alam mo ang gagawin
aso o pusang gala, taong gubat man, kakain
sa tusong matsing, gutom ay napaglalalangan din

di pwedeng "mind over matter", isipin mong busog ka
sa panahon ng lockdown ay isipin mong busog ka
aba'y magugutom ka pag di ka kumain, tanga
"matter over mind", pagkalam ng tiyan, kumain ka

- gregbituinjr.

Marami nang namatay sa sakit, di sa gutom

Marami nang namatay sa sakit, di sa gutom

marami nang sa COVID ay namatay nang tuluyan
namatay sa gutom ay wala pang nabalitaan
dahil ba likas sa taong gumawa ng paraan
upang pamilya'y di magutom, may laman ang tiyan

may namatay dahil binaril ng mga halimaw
nagprotesta dahil sa gutom, ito ang malinaw
tagtuyot sa Kidapawan, walang ani, malinaw
at sila'y binaril, tatlong magsasaka'y pumanaw

gayong lehitimo naman ang panawagan nila
ngunit iba ang COVID na tao'y na-kwarantina
walang sakit, walang ring trabaho, may paraan pa
laban sa gutom, bayanihan ang mga pamilya

wala pang namamatay sa gutom, kahit pa dukha
dahil likas sa taong may paraang ginagawa
subalit sa COVID, baka di sila makawala
nananalasang sakit na ito'y nakakahawa

frontliners na doktor, nars, kayrami nilang namatay
upang sagipin nila sa sakit ang ibang buhay
sa mga frontliner, taos-puso pong pagpupugay
salamat! nawa'y di kayo magkasakit! mabuhay!

- gregbituinjr.

Magbasa-basa habang nasa lockdown

Magbasa-basa habang nasa lockdown

magbasa-basa habang tayo'y nasa kwarantina
magbasa ng tula, kwento, sanaysay at nobela
magbasa ng akda ni Edgar Allan Poe't iba pa
magbasa rin ng mga pilosopiya't teorya

mag-ehersisyo muna sa umaga pagkagising
at pagkatapos ng gawaing bahay ay magsaing
mag-sudoku muna bago o matapos kumain
sunod ay magbasa ng dyaryo, aklat o magasin

huwag sayangin ang oras sa walang katuturan
tulad ng inom, at pamilya'y napapabayaan
magbasang tila may himagsikang paghahandaan
patalasin ang isip ng maraming kaalaman

magbasa rin ng iba't ibang nobelang klasiko
basahin mo rin ang iba't ibang kwento't soneto
mga tula ni Shakespeare ba'y nauunawaan mo
magbasa-basa pagkat nasa lockdown pa rin tayo

- gregbituinjr.

Ang Manggahan Low Rise Building Project sa Pasig

Ang Manggahan Low Rise Building Project sa Pasig

Saliksik at sanaysay ni Greg Bituin Jr.

Sa isang blog ay tinalakay ng dalawang babaeng awtor ang tungkol sa Manggahan Low Rise Building Project na umano'y isang climate-resilient na gusali. Ibig sabihin, matatag na itinayo ang gusali anumang klima pa ang magdaan, tulad ng matinding bagyo at pagtaas ng tubig. Halina't hanguan natin ng aral ang kwentong ito.

Ipinaliwanag ito nina Talia Chorover and Jessica Arriens sa kanilang artikulong pinamagatang "Faced with Forced Relocation, the People of One Philippine City Designed Their Own Climate-resilient Neighborhood" na nalathala sa kanilang blog noong Enero 6, 2020.

Nang tumama ang Bagyong Ondoy sa Pilipinas noong 2009, 40,000 katao ang nakatira sa mga iskwater, tulad ng Manggahan Floodway, isang artipisyal na daanan ng tubig na itinayo upang mabawasan ang peligro ng baha. Nagtapon ng isang buwang dami ng tubig ang bagyong Ondoy sa ilang oras lamang. Biglaan. Maraming nawalang buhay at ari-arian.

Matapos nito, nagpasya ang pamahalaan na alisin agad ang mga nakatira sa danger zones, at nagbanta ang mga awtoridad na wasakin ang mga bahay ng mga taong ayaw umalis. 

Kaya nabuo bilang tugon ang Alliance of Peoples’ Organizations Along Manggahan Floodway (APOAMF). Ipinaglaban nila ang karapatan ng mga pamilya sa pabahay at lupain, at manatili sa kanilang lungsod.

Noong 2010, inilunsad ng APOAMF ang People’s Plan, isang prosesong nakabatay sa partisipasyon ng maralita na bumuo ng alternatibong pabahay. Pinayagan ng plano ang mga residente ng Manggahan na magplano ng isang bagong anyo ng pabahay na hindi malayo sa kanilang komunidad.

Nakipagtulungan ang mga residente sa isang arkitekto at sa lokal at pambansang mga opisyal ng gobyerno para sa lokasyon at disenyo, na nakapwesto sa lugar na mababawasan ang peligro sa pagbaha. Nagtatampok ito ng mga matitibay na materyales, makapal na dingding at kisame, nakataas na tangke ng tubig, at estratehikong paglagay ng mga istraktura upang matatag na nakatayo pa rin kahit sa matinding pagbaha o bagyo.

Nakipag-usap ang APOAMF sa gobyerno at itinaguyod nila ang kanilang plano sa lokal, pambansa at internasyonal na antas bago nila opiyal na lagdaan ang kasunduan. Nagsimula ang konstruksyon noong 2017. Kapag nakumpleto, dapat ang proyekto’y magkaroon ng kabuuang 15 mga gusali na may 900 mga yunit, o 60 yunit bawat gusali. Sa ngayon, 480 na pamilya na ang nakalipat sa mga rent-to-own na mga apartment.

Habang binibigyan nito ng pagkakataon ang maraming pamilya na manatili sa Lungsod ng Pasig, di nito kayang mapagbigyan ang lahat. Lalo na't maraming tao na ang nailipat sa mga lugar na higit isang oras ang layo. Gayunpaman marami pa rin ang maaaring matutunan ng ibang mga komunidad mula sa proyekto. Nabanggit ng dalawang awtor sa kanilang artikulo ang  Global Commission on Adaptation’s Action Tracks on Cities and Locally Led Action, na maganda rin na ating alamin kung ano ito. Sa People’s Plan, nakipagtulungan sa proyekto ang mga miyembro ng komunidad at tiniyak ang pagiging matatag o resiliency ng komunidad, nang may nagkakaisang pananaw at malinaw na mga layunin.

Noong panahong buhay pa si Ka Roger Borromeo ng Kongreso ng Pagkakaisa ng Maralitang Lungsod (KPML), napuntahan namin itong Manggahan Floodway matapos ang Ondoy. Kaya nakita ko kung paano nasalanta ng Ondoy ang maraming lugar, tulad ng Santolan at Manggahan Floodway. Kaya naging interesado agad ako sa balitang ito.

Suriin natin at aralin ang mga ito at kung kinakailangan ay magawa rin natin sa ating mga komunidad.

Pinaghalawan: https://www.wri.org/blog/2020/01/faced-forced-relocation-people-one-philippine-city-designed-their-own-climate-resilient

Tingnan din ang kawing na:

http://countrysafeguardsystems.net/sites/default/files/Manggahan%20Floodway%20In-City%20Resettlement%20for%20Informal%20Settler%20Families.pdf

* Unang nalathala sa pahayagang Taliba ng Maralita, ang opisyal na pahayagan ng Kongreso ng Pagkakaisa ng Maralitang Lungsod (KPML), isyu ng Abril 1-15, 2020, pp. 10-11.

Taumbayan ang mapagpalaya - Che Guevara

TAUMBAYAN ANG MAPAGPALAYA

“I am not a liberator. Liberators do not exist. The people liberate themselves.” ~ Che Guevara

wala raw liberador o taong nagpapalaya
ng pinagsamantalahang alipin, uri't bansa
kundi nagpalaya sa kanila'y sila ring madla
sabi iyan ni Che, rebolusyonaryong dakila

walang isang superman o isang tagapagligtas
oo, walang isang magaling na tagapagligtas
kundi tao'y nagkapitbisig, tinahak ang landas
ng paglaya tungo sa asam na lipunang patas

totoo, di si Bonifacio kundi Katipunan
at di rin si Aguinaldo kundi ang sambayanan
di si Jose Rizal na binaril sa Bagumbayan
kundi ang mamamayan ang nagpalaya ng bayan

pinag-alab lang ng Katipunan ang mitsa't puso
nang bayan ay lumahok sa pagbabagong madugo
ang pagpaslang kay Rizal ay nagpaalab ding buo
sa madlang ang pang-aalipinin ay nais maglaho

di si Enrile't Ramos ang nagpatalsik kay Marcos
kundi mamamayang ayaw na sa pambubusabos
di si Gloria ang nagpatalsik kay Erap na Big Boss
produkto lamang siya ng pag-aalsang Edsa Dos

kaya tama si Che, mamamayan ang nagpalaya
sa kanilang sarili, pagkat nakibakang sadya
mabuhay ka, Che, walang isang tagapagpalaya
walang isang taong tagapagligtas kundi madla

- gregbituinjr.
04.12.2020 (Easter Sunday)

Anong nais natin sa Buwan ng Panitikan?

Anong nais natin sa Buwan ng Panitikan?

Buwan ng Panitikan ang Abril, anong gagawin

Upang panitikan ng masa'y lalong payabungin?

Wastong pagsusulat na may prinsipyo't adhikain

Ang kwento, tula't nobela sa masa'y pagsilbihin

Nagnanais bang panitikan ay maging kakampi?

Naghahangad ba itong sa manggagawa'y magsilbi

Gutom ang dukhang anong sipag sa araw at gabi

Panitikan ba'y tutula ng kanyang pagkaapi?

Anong resultang hangad para sa bawat babasa?

Nobela kaya'y magkwento ng pagsasamantala?

Itutula mo ba ang manggagawa't magsasaka?

Tulay mo bang tatahakin ay sanaysay ng dusa?

Isipin natin anong makabubuti sa madla

Kung ito ba'y magsisilbi sa mga hampaslupa?

Ang panitikang nais natin ay di ngawa't luha

Ngunit patungo sa tagumpay ng anak-dalita

- gregbituinjr.

04,12,2020

* Sa pamamagitan ng Proklamasyon Blg. 968, s. 2015, ang Abril ay pinagtibay bilang Buwan ng Panitikan. Marahil ay dahil tuwing Abril 2 ang kaarawan ng dakilang makatang Francisco Balagtas, na kinikilala sa kanyang walang kamatayang Florante at Laura. 

Sabi nila'y "Presente"

Sabi nila'y "Presente"

"Presente", ang sabi nilang may hawak na larawan
sa taunang Kalbaryo ng Kawalang Katarungan
patunay na ang mahal nila'y di nalilimutan
na winala noon, di na makita ang katawan

sila'y iwinala gayong pinaglaban ang tama
pagbabago ang adhika, bayan ay mapalaya
mula sa kuko ng mapagsamantala't kuhila
hanggang ngayon, ang hinahanap na hustisya'y wala

"Presente" para sa lahat ng desaparesidos
ito rin ang sigaw kong nakikibaka ng lubos
sigaw rin ng ibang ang pakikibaka'y di tapos
na sa masa'y patuloy pang naglilingkod ng taos

tuloy ang paghahanap sa katawan at hustisya
ng mga nagmamahal at naulilang pamilya
hiling na kahit katawan sana'y matagpuan na
"Presente", hustisyang asam nawa'y kamtin na nila

- gregbituinjr.

Ang ulam namin kagabi

Ang ulam namin kagabi

sardinas na may talbos ng kamote at kamatis
simpleng ulam kagabi upang gutom ay mapalis
sa panahon ng lockdown ay magtipid at magtiis
di lumalabas ng bahay, animo'y dusa't hapis

talbos ng kamote na may kamatis at sardinas
talbos na tanim, sa bakuran lang namin pinitas
habang nasa isip ay paano na kaya bukas
habang kakaunti na lang ang nariritong bigas

kamatis na may sardinas at sa kamote'y talbos
ulam itong pang-relief, pang-survivor, at pangkapos
walang trabaho, walang kayod, wala ring panggastos
gayunman, pasalamat na rin kami't nakaraos

sardinas na may kamatis at talbos ng kamote
ito lamang ang payak na ulam namin kagabi
nakakabusog na rin, kahit kaunti'y mabuti
pampalipas ng gutom, pampalusog din, ang sabi

- gregbituinjr.

Bala, Bale, Bali, Balo

BALA, BALE, BALI, BALO

ang pasaway, babarilin, mamamatay sa bala
kaya sumunod ka na lang daw kung ayaw magdusa
nagutom ang tao kaya lumabas ng kalsada
krimen na bang magutom at pagpaslang ang parusa?

ang turing lang sa buhay ay balewala, di bale
di baleng pumatay, hilig kasi ng presidente
naglalaway sa dugo ng "pasaway" na kayrami
na sa gutom ay nagprotesta't daing ay sinabi

ilan sa kanila'y pinalo, likod ay may bali
natutunan yata'y hazing ng namamalong hari
hazing nila'y disiplinang pagbabakasakali
bastos sa karapatang pantao, nakakamuhi

batas ng pangulo'y lumikha ng maraming balo
E.J.K. dito, E.J.K. doon, ano na ito?
solusyon lang sa problema'y pagpaslang, ano ito?
halimaw na pamamaraan ng sukab at gago!

- gregbituinjr.

Ang karapatan natin sa sapat na pagkain

ANG KARAPATAN NATIN SA SAPAT NA PAGKAIN

Maikling saliksik at sanaysay ni Greg Bituin Jr.

Sinasabi nilang dalawa lang umano ang dahilan o sitwasyon kung bakit ka pakakainin ng gobyerno - sa panahon ng digmaan o sa panahon ng kalamidad. Kung wala isa man sa mga ito, kumilos ka o magtrabaho upang makakain. Ang panahon ngayon ay pumapatak sa dalawa - digmaan laban sa COVID-19, at kalamidad dahil hindi na makapagtrabaho ang tao dahil sa ipinatutupad na community quaran-tine, kung saan pinapayuhan ang mga tao, upang hindi mahawa ng sakit, na huwag lumabas ng bahay.

Ang karapatan sa pagkain ang isa sa limang karapatang nakasaad sa International Covenant on Economic, Social and Cultural Rights o ICESCR. Ang apat na iba pa ay ang pabahay, kalusugan, trabaho, at edukasyon. Ang karapatang ito'y nakasulat din sa dokumentong The Right to Adequate Food, OHCHR Fact Sheet No. 34, OHCHR/FAO (2010). Ang OHCHR ay Office of the High Commissioner on Human Rights ng United Nations. 

Sa General Comment No. 12 ng UN Committe on Economic, Social and Cultural Rights (CESCR), nagbigay sila ng detalyadong patnubay sa mga bansa hinggil sa kanilang obligasyong igalang, protektahan at tuparin ang karapatang magkaroon ng sapat na pagkain. Nabanggit din ng Komite na kasama ang karapatan sa mga sumusunod na magkakaugnay at mahahalagang salik o elemento ng karapatan sa sapat na pagkain: Availability, Accessibility, Adequacy, at Sustainability. 

AVAILABILITY o pagkakaroon ng agarang suplay ng pagkain. Ang bawat tao'y dapat makakuha ng sapat at dekalidad na pagkain, na maaaring mula sa palengke o direkta mula sa tanim, alagang hayop o sa dagat, at iba pang likas na yaman. Pagkaing nakapagpapalusog, at dapat walang nakakapinsalang sangkap at naaangkop sa kultura.

ACCESSIBILITY o madaling makuhang pagkain. Dapat ang pagkakaroon ng sapat na pagkain, ay walang diskriminasyon, na ang pagkain ng mayaman ay kaya ring kainin ng mahihirap. At ang presyo ng pagkain ay abotkaya ng mga bulnerableng sektor ng ating lipunan.

ADEQUACY o pagiging sapat ng pagkain. Dapat hindi kulang, at sapat ang pagkain kung saan kayang kumain ng tao, kahit na dukha, ng tatlong beses sa isang araw, at busog sila.

SUSTAINABILITY o tuloy-tuloy na paglikha ng pagkain. Dahil ang mga tao'y kumakain araw-araw, dapat na patuloy din ang paglika ng pagkain. Dapat nating pasalamatan ang lahat ng magsasaka dahil kung wala sila, wala tayong kakainin araw-araw. 

Sabi nga, di natin kailangan ng abugado o doktor araw-araw, ngunit kailangan natin ng magsasaka araw-araw. Kaya salamat sa lahat ng magsasaka, mangingisda, magtutubo, magninyog, at mga manggagawang patuloy na lumilikha ng pagkain. Mabuhay kayo! 

Pinaghalawan: 

https://www.escr-net.org/rights/food

https://www.ohchr.org/EN/Issues/ESCR/Pages/Food.aspx

* Ang maikling artikulong ito'y inihanda at unang nilathala sa pahayagang Taliba ng Maralita, ang opisyal na publikasyon ng Kongreso ng Pagkakaisa ng Maralitang Lungsod (KPML), isyu ng Abril 1-15, 2020, pahina 2.
* Ang mga litrato ay mula sa fb, at nauna nang nalathala sa Taliba ng Maralita, isyu ng Marso 16-31, 2020.

Mahirap maging alagain

Mahirap maging alagain

Magpalakas tayo ng katawan upang magtagal
Ang buhay, uminom din ng bitamina't mineral
Habang nasa lockdown pa'y alamin din itong aral:
Iwasang magkasakit, sa isip natin ikintal
Ramdam mo ang sitwasyon, kayhirap nang maospital

Ang malipasan ka ng gutom ay huwag gagawin
Pagkain ng tama sa oras ay wastong tungkulin
Maghinaw ng kamay bago at matapos kumain
At walong basong tubig kada araw ay inumin
Gumising lagi ng maaga't mag-ehersisyo rin

Ingatan lagi ang iyong katawan at pamilya
Na hangad mapabuti pa ang kalusugan nila
Gawin lagi'y tama't palakasin ang resistensya
At magluto ng gulay, kumain ng masustansya
Layuan na ang junk food at baka magkasakit pa

Anong hirap magkasakit at maging alagain
Gayunman, tulungan ang kapwang nagiging sakitin
Ayokong magkasakit, sa iba'y maging pasanin
Ito'y ating pakaiwasan hangga't kakayanin
Ngayon pa lang, kalusugan ay alagaan natin

- gregbituinjr.

Panakip-butas na pagbabago?

PANAKIP-BUTAS NA PAGBABAGO?

I

panakit-butas ang pagbabagong hinain nila

magbago ka na, ang sabi, dahil lang nadakip ka

pinilit kang yakapin ang sistemang isinuka

sinabihang pag lumaya'y magbagong-buhay ka na

dahil natortyur ka't ilang taon din sa piitan

ngayon, laya ka na, sumumpang magbagong tuluyan

bakit? napagtanto mo bang mali ang kinilusan?

o sa sistemang bulok na'y magbubulag-bulagan?

II

dahil lang nagkaasawa, ikaw na'y magbabago?

tanggap na ba ang isinuka mong salitang "lie low"?

na sabi mo nga'y wala sa iyong bokabularyo

ngayon, heto, sistemang bulok na'y yayakapin mo?

sinabi ng asawa mong magtrabaho ka na lang

dahil sa pagmamahal agad tatango ka na lang?

kahit kita mong binubusabos pa rin ang bayan

ay magpapaalipin na sa burgesyang kalaban

III

dahil sinabihan ka ng magulang, tumigil ka!

susunod ka na lang ba, kahit may isyu't problema?

magbubulag-bulagan ka na lang sa nakikita?

dahil ayaw ng magulang mong maging aktibo ka?

nasaan ang prinsipyo mo't layuning sinimulan?

balewala ba lahat ng iyong pinaghirapan?

di pa nananalo'y bakit mo iiwan ang laban?

ano't sistemang bulok na'y yayakaping tuluyan?

- gregbituinjr.

Mabuti't di sumasamâ ang lasa

Mabuti't di sumasamâ ang lasa

habang salot na COVID-19 ay nananalasa

na sa buong daigdig ay tinuring na pandemya

mabuti't kami rito'y di sumasamâ ang lasa

pamilya'y inaalagaan habang kwarantina

ang sabi nga sa patalastas: "Bawal magkasakit!"

"Gamot ay laging bago", ang isang botika'y hirit

"Huwag mahihiyang magtanong", alam na kung bakit

sa isa'y "Mabisa na, matipid pa", presyo'y sulit

maagang gigising, magpapainit sa umaga

di ng kape o bahaw, kundi ulo hanggang paa

kailangang mainitan ang katawan tuwina

upang lumusog at mapalakas ang resistensya

iba ang sitwasyon ngayon sa ating kasaysayan

kaya pangalagaan na ang sariling katawan

kahit nagtitipid basta huwag lang magutuman

at kalusugan ng pamilya'y huwag pabayaan

- gregbituinjr.

04.09.2020 (Araw ng Kagitingan)

Di tayo sisiw na basta pagsasamantalahan

Di tayo sisiw na basta pagsasamantalahan

di tayo sisiw na basta pagsasamantalahan

ng mga ibong mandaragit at tusong gahaman

tayo'y may dignidad na laging pinanghahawakan

na iwing dangal ay dapat irespeto ninuman

di bahag ang buntot natin sa sinumang berdugo

na naglalaway sa dugo't nanonokhang ng tao

matindi pa sa COVID-19 ang salot na ito

sasabihing nanlaban kahit dukha'y nagsusumamo

di bahag ang buntot natin sa sinumang diktador

na dinulot sa bayan ay barbarismo, que horror!

mga tiwali ang sa pamahalaan nagmotor

na dapat labanan ng bayan ng giting at balor

mahalaga ang buhay sa bawat pintig ng puso

idaan sa wastong proseso ang tungkuling hinango

wala silang karapatang buhay ay mapaglaho

ngunit sa kanila'y kaysaya ng mga hunyango

mahihirap man kami, mayroon kaming dignidad

na ipaglalaban gaano man ang aming edad

maralitang nagsisikap ding buhay ay umunlad

basta't nasa tama, at wasto ang mga palakad

- gregbituinjr.

04.09.2020 (Araw ng Kagitingan)

Pasasalamat sa mga frontliners ngayong Araw ng Kagitingan

Pasasalamat sa mga frontliners ngayong Araw ng Kagitingan

Makabagong bayani ang mga frontliners, oo
Anong tindi ng kanilang ambag at sakripisyo
Kahit lockdown ay patuloy ang kanilang serbisyo
At ginamot ang may COVID, tinamaang totoo

Bayani sa naiibang kaharap na giyera
At nagsitulong laban sa sakit na nanalasa
Gumaling din ang iba't may namatay sa kanila
O, mga frontliners, tulong n'yo'y napakahalaga!

Nais naming pagpugayan bawat isa sa inyo
Ginawa n'yo bawat makakaya para sa tao
Buhay ang nakataya, mga bansa'y pinerwisyo
At kayo'y di umatras, bagkus ay kumilos kayo!

Yinanig man ang mundo ng sakit na kumakalat
Ay naririyan kayong ang tulong ay di masukat
Nawa'y di rin magkasakit. Mabuhay kayong lahat!
Itong tula'y bilang taospusong pasasalamat!

- gregbituinjr.
04.09.2020

Pagpupugay sa magigiting

Pagpupugay sa magigiting

Araw ng kagitingan sa kasaysayan ng bansa
Rebelyon laban sa mananakop at pagbabanta
Araw ng pagbagsak ng Bataan at mandirigma
Wari'y larangan sa dugo ng Pinoy ay nagbaha

Nakibaka sila, nakibakang mga bayani
Ginawa ang wasto, naglingkod, sa bayan nagsilbi
Kalayaan ang adhikain, di nag-atubili
Ang nangalugmok sa digma'y dapat ipagmalaki

Gising ang bayan, lumaban para sa kalayaan
Inisip ang kinabukasan ng mahal na bayan
Tumimo ang aral nito sa ating kabataan
Ipaglaban ang laya mula sa tuso't dayuhan

Nag-alay ng buhay ang bunying henerasyon nila
Grupong Huk, kawal Pilipino, lumaban sa gera
Ang sakripisyo nila'y pasalamatan tuwina
Nagpapasalamat kami sa mga nakibaka

- gregbituinjr.
04.09.2020

Mayo Uno ang bagong simula

MAYO UNO ANG BAGONG SIMULA

community quarantine ay magpapatuloy pa nga
extended hanggang bisperas ng Araw ng Paggawa
bagong anunsyo ito ng gobyernong may ginawa
subalit ubos na raw ang pondo, kahanga-hanga
mga tao raw ang sa pagkain nila'y bahala

paano na kikita sa harap ng kwarantina
kung bahala nang maghanap ng pagkain ang masa
bakit hinuli pa ang mga vendors na nagtinda
kung nakakulong lang sa bahay, di sila kikita
mga hinuling nagtindang vendors, palayain na!

nauubos din ang ipon at sahod ng obrero
kung sa bahay lang, kikita ba kung walang trabaho
panahong lockdown, konting pagkain, mag-aayuno
upang makatipid sa dinaranas na delubyo
gayunman, kakayanin pa ba ang dalawang linggo

magkita-kita sa Mayo Uno, bagong simula
at bagong pagbaka laban sa sistemang kuhila
muling magkakapitbisig ang uring manggagawa
upang magkaisa, mag-usap, magplano't magtakda
upang ibagsak na ang sistemang kasumpa-sumpa

- gregbituinjr.
04.07.2020 (World Health Day)

Pasasalamat sa Bulig Pilipinas

Pasasalamat sa Bulig Pilipinas

Bulig Pilipinas, kayo'y sadyang kahanga-hanga
Umpisa pa lang, tumulong agad sa walang-wala
Laging handang umalalay sa mga api't dukha
Inisip agad ang kapakanan ng abang madla.

Ginawa'y naghanda ng pagkain, at nagpakain
Pinuntahan ang mga dukhang nabahaginan din
Ito'y panahong lockdown o community quarantine
Lubusan po kayong pinasasalamatan namin.

Inisip ang kapakanan ng kapwang nagugutom
Pagpapakatao, pag-ibig, prinsipyo, pagbangon
Ito'y sakripisyo, kawanggawa, dakilang layon
Na imbes sa bahay lang kayo, ginawa ang misyon!

Ang inyong halimbawa'y dapat purihing totoo
Salamat po, Bulig Pilipinas! Mabuhay kayo!

- gregbituinjr.
04.07.2020 (World Health Day)

Salamat sa mga frontliners ngayong World Health Day

Salamat sa mga frontliners ngayong World Health Day

ngayong World Health Day, taospuso pong pasasalamat
sa mga frontliners sa inyong tungkuling kaybigat
kaharap n'yo'y sakit na di makita o masalat
naririyan pa rin kayong ginagawa ang lahat
anong tindi ng nakaatang sa inyong balikat

sa inyong frontliners, salamat po ng buong puso
kayraming kwento ng doktor, nars, iba't ibang tagpo
reporter, basurero, obrerong loob ay buo
maraming doktor na'y nawala, buhay ay naglaho
nalagas ang maraming buhay, nakapanlulumo

dahil sa lockdown, mamamayan ay sa bahay muna
mabagal man, gobyerno'y may pakimkim sa pamilya
kayo'y nakaharap sa sakit na nananalasa
dahil sa kwarantina, pamilya'y di makasama
sa kabila nito, frontliners kayong mahalaga

O, frontliners, nawa'y di kayo dapuan ng sakit
tumutulong sa di kilala, nagpapakasakit
salamat sa sakripisyo n'yo't pagmamalasakit
ang wish namin sa World Health Day, di kayo magkasakit
pasasalamat namin sa inyo'y paulit-ulit

- gregbituinjr.
04.07.2020

Tula sa World Health Day

Tula sa World Health Day

Walang sinumang lalabas kapag naka-quarantine
Oo, ito'y sabi ng gobyerno't dapat daw sundin
Rinig mo ang sabi, pag lumabag ka'y papatayin!
Lagot ka! Mahirap na't baka paglamayan ka rin!

Dapat tutukan nila'y ang sakit, di ang pasaway
Hanap lang nitong dukha'y pagkain, gutom ngang tunay
E, bakit lalabas pa? Nais ba nilang mapatay?
Aba'y magugutom ang pamilya't di mapalagay!

Lagi dapat igalang ang karapatang pantao
Tulad din ng karapatan ng dalita't obrero
Hintayin lang nating matapos ang lockdown na ito
Dahil masa'y maniningil sa palpak na serbisyo

At sa World Health Day, alalahanin ang kalusugan
Yugto itong di dapat balewalain ninuman

- gregbituinjr.
04.07.2020

Sa World Health Day: FREE MASS TESTING NOW!

Sa World Health Day: FREE MASS TESTING NOW!

World Health Day, pandaigdigang araw ng kalusugan

Oo, araw upang suriin ang pangangatawan

Ramdam mo ba kung sumasakit ang iyong kalamnan

Lalo't nananalasa ang COVID-19 sa bayan.

Dinggin natin at alamin ang nangyayari't ulat

Habang may kwarantina'y anong isinisiwalat

Eksperto'y anong sabi nang di mahawa ang lahat

Ano pang gagawin upang sakit ay di kumalat.

Lockdown o community quarantine pansamantala

Tayo'y manatili sa bahay, ayon sa kanila

Habang masa'y nagugutom, naghahanap ng pera

Dahil puno ng pangambang magutom ang pamilya.

At ngayong World Health Day, sabay-sabay nating isigaw:

Yamang ang araw na ito'y atin: FREE MASS TESTING NOW!

- gregbituinjr.

04.07.2020

Soneto sa World Health Day

Soneto sa World Health Day

World Health Day, pandaigdigang araw ng kalusugan

Organisadong araw para sa pangangatawan

Ramdam mo ba kung may sakit kang dapat malunasan

Lockdown pa't baka walang masakyan pag kailangan

Damhin mo ang kalamnan, pulso, ulo, dibdib, panga

Haplusin ang kutis, puso't katawan ba'y okey pa?

Espesyalista ba'y nahan, kilala mo ba sila?

At pag kailangan na, sila'y matatawagan ba?

Laging kalusugan mo't ng pamilya'y isipin din

Tingnan ang katawan, sila ba'y namamayat na rin

Habang malakas pa, kalusuga'y asikasuhin

Dahil mahirap magkasakit, maging alagain

Ating kalusugan ay lagi nating alagaan

Yamang ito'y kayamanang di dapat pabayaan

- gregbituinjr.

04.07.2020

Mga unipormadong utak-hazing

Mga unipormadong utak-hazing

matindi ang nangyari sa mga taga-San Roque

na nilahad sa panayam ng isang residente

aniya, "Dumating 'yung mga naka-uniporme"

walang awa, pinagpapalo ang mga lalake."

bakit agad silang namamalo, sino ba sila?

dahil ba hazing ang natutunan sa akademya?

hazing pa ba ang paraan nila ng disiplina?

ngunit di sa kanilang kadete kundi sa masa

karamihan sa naroo'y di makapagtrabaho

dahil sa lockdown, walang pera ang dukha't obrero

saan kukuha ng pagkain, isip ay paano

kung pamilya ba'y magkasakit, tutulong ba'y sino

karumal-dumal, sadista ang kanilang gawain

bakit ang gutom ng dukha'y di nila unawain

kahiya-hiya na sila, awtoridad pa man din

dahil inaral lang yata'y kung paano mang-hazing

naging animal dahil may baril, kapangyarihan

gayong di kriminal ang masang nagugutom lamang

karapatang pantao'y dapat nilang matutunan

kung kailangan, magbalik sila sa paaralan

- gregbituinjr.

* mula sa balita ng Rappler.com, Abril 1, 2020, na may pamagat na "Quezon city residents demanding help amid lockdown arrested by police"

Donasyon sa lockdown

Donasyon sa lockdown

sa panahon ng lockdown, may natanggap ka bang tulong?

nakakakain ka pa ba kahit adobong kangkong?

o pulos delata't noodles sa iyong barungbarong

ang natanggap mo? buti't di ka nagkaka-kurikong

mabilis ba ang serbisyo ng mga pulitiko?

o sa binigay nila, may pangalan sila rito?

sa donasyon ba'y kaylaki ng pangalan ng trapo?

eleksyon ba'y malapit na't nais nang maiboto?

malaki daw ang pondo ng gobyernong inilaan

upang may makain ang na-lockdown na taumbayan

bilyong perang aprubado ng mga kinatawan

bilyon-bilyong pisong sana'y di kunin ng kawatan

karapatan nating kunin ang donasyong pagkain

mahirap man o mayaman, may donasyon sa atin

may nakaimbak ang mayaman, at mauubos din

walang naimbak ang mahirap kaya gugutumin

- gregbituinjr.

Anila, "Stay at home"

ANILA, "STAY AT HOME"

panawagan ngayong / lockdown, "Stay at home."

basta may pagkain / upang di magutom

sundin lamang ito / sa panahong lockdown

dapat kung mayroon / tayong malalamon.

"Stay at home" ngayong / naka-kwarantina

subalit pamilya'y / may makakain ba?

dapat tiyaking may / pagkain sa mesa

nang di magkasakit / ang buong pamilya.

mayroon ba kayong / pambili ng bigas?

tigil sa trabaho, / paano na bukas?

paano rin naman / kung walang lalabas?

sinong magbibigay / ng ulam at prutas?

"Stay at home" muna / kahit walang pera

"Stay at home" ka lang, / bukas, bahala na...

tutulong ba sila / pag nagkasakit ka?

o pag nagka-virus, / magagamot ka ba?

- gregbituinjr.

Isabuhay ang Kartilya ng Katipunan

ISABUHAY ANG KARTILYA NG KATIPUNAN

hangad namin ay kaginhawahan ng ating bayan

hangad din ito ng makasaysayang Katipunan

marangal na layunin at adhikang sinimulan

kaya misyong ito'y dapat mahusay na gampanan

Kartilya ng Katipunan ay isinasapuso

labanan ang pang-aapi, dugo man ay mabubo

pagsasamantala sa kapwa'y dapat nang maglaho

makibaka nang lipunang makatao'y matayo

ang buhay na di ginugol sa malaking dahilan

ay kahoy na walang lilim o damong makamandag

ang pagkakawanggawa ang tunay na kabanalan

sa taong may hiya, salita'y panunumpa naman

karapatang pantao'y ating itinataguyod

aralin natin ang Kartilya at sa puso'y ibuod

pagpapakatao'y yakapin, sa bayan maglingkod

labanan ang mga mali kahit uugod-ugod

"Kaginhawahan", nasa sulatin ni Bonifacio

"Iisa ang pagkatao ng lahat" kay Jacinto

tunay nga silang bayani ng bansa nating ito

aral nila't Kartilya'y isabuhay ngang totoo

- gregbituinjr.

Ano ang rali?

Ano ang rali?

ang rali'y gawaing magpahayag ng sabay-sabay

madalas kasi'y di pakinggan kung mag-isang tunay

nagrarali ka dahil sa isyu'y di mapalagay

kaysa di magrali't sarili'y hayaang mamatay

mabuting maglahad kaysa sikilin ang damdamin

mabuting magsalita kaysa tumahimik lang din

ang gutom na di matiis, sa sigaw mo lunurin

kung mag-isa ka lang, sino ang sa iyo papansin

sabay-sabay na pagpapahayag ng mamamayan

ang rali dahil kung mag-isa ka'y di pakikinggan

ayusin ang pagkilos upang maparating naman

ang mensaheng dapat dinggin ng kinauukulan

kung di marinig, isulat sa plakard ang mensahe

nang makita ng madla ang tindig mo't sinasabi

paraan ng pagpahayag, huwag mag-atubuli

sabayang pagpapahayag ang esensya ng rali

nag-iisip din ang dukhang di na kaya ang gutom

nangangalampag sila sa mga utak-marunong

na nasa poder, na ibinoto rin nila noon

sakaling sa hinaing nila'y agad na tumugon 

rali'y pagdulog din ng problema sa mga paham

matugunan ang isyu't dapat silang makialam

at maabot din ang publikong dapat makaalam

upang isyu'y pag-usapan nang ito'y matugunan

- gregbituinjr.

Mabuhay ka, Chel Diokno!

Mabuhay ka, Chel Diokno!

Chel Diokno, pinakita'y ngipin at liderato

may ngipin laban sa pang-aapi't pang-aabuso

kahit naninira'y dating huwes at abugado

subalit naging pangulo ng bayang Pilipino

di kayang gibain, haring praning man ang bumira

pagtulungan ka man nila'y kasangga mo ang masa

magpatuloy ka sa ginagawa mong magaganda

ipagtanggol ang wasto't gawin ang tama tuwina

Chel Diokno, senador ng masa, tagapagtanggol

di ka lang nanalo, marahil kulang sa panggugol

kumpara sa tatlong B.bi, buduts, bato at bukol

na kaya marahil nanalo'y kadikit ng ulol

"papatayin ko kayo!" sabi ng matinong gago

si Chel ay: "Ipagtanggol ang karapatang pantao!

May batas tayo. Respetuhin ang wastong proseso!

Dapat may due process, at di dapat umaabuso!"

napangitan man sa ngipin mo ang mukhang kulugo

ang kanyang bunganga naman ay pagkabaho-baho

lagi na lang "patayin ko kayo!" ang nasa nguso

dapat taumbayan na sa puwet niya'y mamalo

huling hirit pa, kayputi pala ng iyong ngipin

sa pangulo'y kaybaho, ngipin pa yata'y nangitim

animo'y sabaw ng pusit at budhi ng salarin

salamat at sa masa'y nakakangiti ka pa rin

- gregbituinjr.

Mabuti pa yata ang puno ng saging, may puso

Mabuti pa yata ang puno ng saging, may puso

mabuti pa yata ang puno ng saging, may puso

di gaya niyang pulos pagpaslang ang nasa nguso

"papatayin ko kayo!" ang sabi ng mukhang tuko

maton ngunit isip-bata, ang bunganga'y kaybaho

bukambibig ang pagbabanta at mga pahaging

tila walang puso, mabuti't may puno ng saging

utak-balisawsaw ang sugo ng pusong-balimbing

animo'y walang pagpapakatao ni katiting

sabi ng marami, tugon niya lagi'y pagpaslang

sa unang taon lang niya, libo na ang napaslang

sa nagprotestang nagugutom, tugon ay pagpaslang

laging alam na solusyon sa problema'y pagpaslang

ah, sino ba sa mga namumuno ang may puso

kung ang pinuno'y wala, sino na lang ang matino

kung puso ng saging kaya'y kainin ng pinuno

magpapakatao na ba't pamumuno'y may puso

- gregbituinjr.

04.04.2020