Lahat ng Tao'y May Karapatan - 2nd Pinduteros Choice Award

maraming salamat sa HR Online sa award na ito na tinanggap ko noong Human Rights Day, Dec. 10, 2012, sa PETA Theater

para sa ulat, paki-click ang http://hronlineph.com/2012/12/12/event-hr-pinduteros-and-pinduteras-have-spoken-2nd-human-rights-pinduteros-choice-are/

ito ang sinabi nang ako'y tinawag:

MOST CLICKED LITERARY POST - SPECIAL RECOGNITION

Isa sa pinakapopular na artikulo sa HRonlinePH.com ay nakasulat sa wikang Pilipino. Mula sa isang manunula, manunulat at aktibista, kinikilala natin ang tulang may pinakamaraming mambabasa. MOST CLICKED LITERARY POST goes to…

Lahat ng tao’y may karapatan

by matangapoy.blogspot.com (Greg Bituin)

Karapatan ng Migranteng Manggagawa

KARAPATAN NG MIGRANTENG MANGGAGAWA
ni Gregorio V. Bituin Jr.
13 pantig bawat taludtod

di ko inaasahang ako'y magtuturo
mabuti't saulado ko ang sasabihin
nang tinawag ako'y di ko sila binigo
sa karapatan nila'y nagbigay-aralin

karapatan ng manggagawang irespeto
at matanggap ang nakabubuhay na sahod
huwag yurakan ang kanilang pagkatao
at sa amo'y di sila dapat magsiluhod

tinalakay ko ang naganap sa Haymarket
na nagwelga't namatayan ng manggagawa
ngunit nagtagumpay sila sa iginiit
naipanalo'y walong oras na paggawa

sumigla ang mga manggagawang migrante
sa kasaysayan ng ganitong pagpanalo
ang paglaban daw pala'y mayroon ding silbi
kaya loob nila'y lumakas ngang totoo

karapatan ng migrante'y may kasunduan
sa pagitan niyong nagkakaisang bansa
basahing maigi ang nakasulat diyan
nang maipaglaban ang kapwa manggagawa

dapat nilang malaman ang mga usapin
upang karapata'y maipagtanggol nila
pag may alam sila'y baka di na gipitin
ngunit ingat, tuso iyang kapitalista

- matapos magtalakay sa mga manggagawang Burmes ng Labor Rights sa tanggapan ng DPNS, Setyembre 24, 2012

Karapatan ang Maghimagsik

KARAPATAN ANG MAGHIMAGSIK
ni Gregorio V. Bituin Jr.
13 pantig bawat taludtod

sa buhay na ito'y di dapat maging dungo
pinahihirapan na'y tango pa ng tango
ang diwa ng paglaya'y atin nang ihango
at durugin yaong mga berdugong lango

yaong mga lango na sa kapangyarihan
yaong mapang-api sa kanyang mamamayan
dapat lamang silang ibagsak ng tuluyan
pagkat maghimagsik ay ating karapatan

- Setyembre 21, 2012, sa tanggapan ng Yaung Chi Oo, Mae Sot, Thailand

Bakahin ang Impunidad

BAKAHIN ANG IMPUNIDAD

ni Gregorio V. Bituin Jr.

14 pantig bawat taludtod

panahon ng ligalig, klima ng impunidad

ililibing na lang ba ang kanilang gunita

sino yaong maysala, sinong dapat maglantad

sa naganap na dahas, sa mga nangawala

sinong mga dinukot at pinaslang sa syudad

sila ba'y aktibista, obrero’t maralita

dahil ba rebolusyon yaong tangkang ilunsad

kaya sila'y dinukot at tuluyang winala

sino ang mga taong mayroong abilidad

na gawin ito't mga pamilya'y pinaluha

sinong nais pumigil sa pagbabagong hangad

ng mga aktibistang ninanasa'y paglaya

pagpaslang, pagkawala, tatak ng impunidad

di mainit na isyu sa pahayaga't madla

mga kaso'y kapara ng pagong sa pag-usad

gayong ito'y isa nang suliraning pambansa

taon nang naghahanap, katarungan ba’y hubad

dangal ang niyurakan, batas ba'y walang bisa

pagkatao’y sinaktan, sa puso na'y sumagad

nasaan ka, hustisya? Ikaw ang aming pita

halina't magkaisa laban sa impunidad

ang puspusang pagbaka'y atin nang isagawa 

malawakang kampanya’y gawin nati’t ilunsad

hustisya'y marapat lang angkinin nitong madla

PAG-INOG NG SALIN MULA WIKANG INGLES SA FILIPINO

community - komunidad

electricity - elektrisidad

possibility - posibilidad

facility - pasilidad

ability - abilidad

city - siyudad

nobility - nobilidad

capacity - kapasidad

university - unibersidad

probability - probabilidad

effectivity - epektibidad

impunity - impunidad

Agosto 30 bilang Pandaigdigang Araw ng mga Nangawala (International Day of the Disappeared)

Nobyembre 23 bilang Pandaigdigang Araw Upang Wakasan ang Kultura ng Impunidad (International Day to End Impunity)

Itigil ang Tortyur

ITIGIL ANG TORTYUR
ni Gregorio V. Bituin Jr.
13 pantig bawat taludtod

1.) TORTURE - (tor' chur) n.- pahirap; pagkaturete ng utak; v.- pahirapan; palipitin; giyagisin;  pigipitin; pahirapan ang isi, TORTURER n.

itigil ang sistematikong pananakit
sa mga biktimang kanilang ginigipit
binubugbog ang katawan, pinipilipit
kaya mistulang nasisiraan ng bait

bakit hinuhuli ang nakikipaglaban
mga nakikibaka'y bakit dapat saktan
gayong inilalaban nila'y karapatan
ng bawat tao at ng buong sambayanan

bakit pinahihirapan ang aktibista
ng mga alagad ng ahas na pasista
dahil ba pinababagsak ang diktadurya
dahil ba pinag-aalsa nila ang masa

mga aktibista'y maganda ang layunin
na sambayanan ay tulungang palayain
ngayon ay tinotortyur at pinaaamin
pinalo't tinatanggalan ng kuko't ngipin

tortyur na ginawa'y iba-ibang diskarte
yaong ari ng lalaki'y kinukuryente
ginagahasa naman daw yaong babae
ganitong pahirap ay nakatuturete

hinuhubaran, may piring ang mga mata
pinaso ng sigarilyo ang dibdib nila
rebelde ang turing sa mga aktibista
pagpapahirap sa kanila'y sobra-sobra

sa mga biktima ng tortyur ang epekto
ay takot at galit sa pasistang gobyerno
itigil ang tortyur, ang tao'y irespeto
magkaiba man sila ng mga prinsipyo

kung ganitong tortyur ay pinaiiral pa
ng gobyernong pasista't mapagsamantala
aba'y dapat lamang baguhin ang sistema
inuuod na ito't kawawa ang masa

Sa Karapatang Pantao Tayo Pumanig

SA KARAPATANG PANTAO TAYO PUMANIG
ni Gregorio V. Bituin Jr.
13 pantig bawat manggagawa

upang patunayan kong ako'y isang kabig
naririto ako't ayoko ng ligalig
respeto sa karapatan ang aking tindig
at sa anumang tiwali'y di padadaig

sa karapatang pantao tayo pumanig
di sa anumang gawaing nakatutulig
kayganda ngang dinuduyan tayo ng himig
nito kaya't sa iba'y huwag palulupig

karapatang pantao'y tanda ng pag-ibig
tulad ng dalagang ang puso'y nananalig
na bawat pasiya'y sa karapatan sandig
kaya mundo'y di na sa dahas manginginig

ang karapatang pantao'y kaygandang himig
puso'y dinuduyan ng malamyos na tinig
kaya marapat lang tayo'y magsumigasig
upang palaganapin ito sa daigdig